Samir Abasovdan hakimlərə etiraz: “VAR-ı rədd eləmək lazımdır”

“Azarkeşlərimizə sağ ol demək istəyirəm. Bizi yaxşı dəstəklədilər. Sağ olsunlar, var olsunlar. Bir də meydançaya baxan uşaqlar var. Son iki matçda çox əziyyət çəkdilər. Bizə şərait yaradan insanlara təşəkkür edirəm. Allah əziyyətlərini yerdə qoymasın. Kölgədə qalan, lakin üzərimizdə əziyyəti olan insanlar var. Fürsət düşdükcə, onlara təşəkkür etmək borcumuzdur”.

Futbolxeber.az saytının məlumatına görə, bu sözləri “Neftçi”nin baş məşqçisi Samir Abasov Azərbaycan Kubokunun 1/4 final mərhələsinin cavab oyununda “Kəpəz”i 1:0 hesabı ilə məğlub etdikləri matçdan sonra deyib.

Daha sonra mütəxəssis jurnalistlərin suallarını cavablandırıb:

- Rəqibi hansı komponentlərdə üstələyərək mərhələ adladınız?

- Birinci oyundan sonra komandanı bugünkü matç üçün hazırlamaq çox önəmli idi. 2:0 hesabı arxayınçılıq baxımından bir qədər təhlükəli idi. Uşaqlar ilk dəqiqədən göstərdilər ki, mərhələni adlamaq niyyəti ilə meydana çıxıblar. Bugünkü hava şəraitinə görə uşaqlar əziyyət çəkirdilər. Bu cür oyunlarda xarakter önə çıxır. Qol buraxmamaq üçün vuruşmalısan. Həddindən artıq konsentrasiyalı olmalısan. Reallığı götürsək, bəlkə də cütün taleyi ilk matçda həll olunmuşdu. Buna baxmayaraq, komandanın bu gün xarakter göstərməsi önəmli idi, futbolçular onu da bacardılar.

- Martın sonu, aprelin əvvəlində “Neftçi”ni çətin oyunlar gözləyir...
- Bizim kimi, yarımfinaldakı rəqibimiz də kuboka köklənib. Baş məşqçilərinin açıqlamalarından da bu, görünür. Həddindən artıq çətin oyunlar olacaq. Oyunumuzu nə qədər tez meydana qoya bilsək, adımızı nə qədər tez geri qaytara bilsək, bu, bizim üçün xeyirdir. Biz də fikirləşirik. Bu il nə qopara biliriksə, qoparmaq istəyirik. Öz adımıza. Bu, həm çempionata aiddir, həm kuboka. Bacardığımız qədər yaxşı oynayacağıq. Pis oynadığımız matçlarda da xal yığmağa çalışacağıq ki, komandanı ən azı mövsümün sonuna kimi ayaqda saxlayaq.

Bir də hakimlər barədə fikir bildirmək istəyirəm. Fikir vermisinizsə, son illər, əvvəl işlədiyim komandada da hakimlər barədə danışmamışam. Lakin son vaxtlar verilən qərarlar, bizim oyunlarda baş verənlər məni narahat etməyə başlayıb. “Neftçi”nin baş məşqçisi kimi. Bu, hardan irəli gəlir? Bilirəm, bu gün bizim kimi hakimlər üçün də çətin idi. Ancaq elə epizodlar var ki, kitabda yazıldığı qədər olmur. Hər şeyi dərk edib, hər şeyi analiz edib ondan sonra qərarlar verilməlidir. Mən bugünkü qırmızı vərəqəyə həddindən artıq çox etiraz elədim və etiraz eləyirəm də. Top bizim oyunçudadır, qarlı havadır, sürüşkəndir meydança. Dediyim kimi, top oyunçumuzdadır, aqressiya yox, top alma yox, ötürmə verir və bundan sonra ayağı gedib dəyir rəqibin ayağına. Həmin anda rəqibin ayağı ilə olan məsafə də həddindən artıq qısadır. Yəni şiddət də yoxdur. Bəlkə kimlər üçünsə var. VAR var, VAR-a baxa-baxa düşünmək üçün vaxtınız var, ay referilər. Mənim düşüncəmdir, o epizodda qırmızılıq bir şey yox idi. Qərara etiraz edirəm. Bir az diqqətli olmaq lazımdır. Başqa cür bu, anlaşıla bilər. Bizim də qarşımıza bəzi epizodları qoya bilərlər ki, əvvəlki matçlarda sizin də xeyrinizə qərarlar verilib. Məsələn, keçən oyunda penallar barədə danışırlar, filan. Amma mən o epizodları demirəm. Mən referilərin üzləşdikləri epizodlarda kitabla yox, düşdükləri situasiyaya uyğun qərar vermələrinin tərəfdarıyam. Bizə göstərilən qırmızı vərəqə düzgün deyildi.

- Hakimin VAR-da epizodu dəyərləndirmək üçün kifayət qədər vaxtı oldu. Siz isə qərarla razılaşmırsınız. O halda bu, qərəzdir, yoxsa hakim səhvi?

- Qərəz deməzdim. Bu, özünü sığorta eləməkdir. Hər halda hakim kitabı açacaq və buna bənzər nə isə orda yazılacaq. Kimin qabağına getsə, kitabı açıb göstərəcək. Necə ki, yol polisi saxlayanda qaydaları izah edir. Lakin mən deyirəm ki, bu VAR-ı rədd eləmək lazımdır. Sən düşdüyün epizoda uyğun qərar verməlisən. Bilmirəm bu hakim futbol oynayıb, ya yox. Sən orda vəziyyətə uyğun qərar qəbul etməlisən. Bax, top mənim ayağımdadır, ötürmə verirəm, sonra ayağım sürüşür gəlib sənin ayağına dəyir. Yəni mən şiddətli hansısa hərəkət etmirəm. Qərəzim də yoxdur. Burda ümumiyyətlə qırmızıdan danışmaq olmaz. VAR səni nə qədər çağırsa da, özün vəziyyəti analiz etməlisən. Sarı ilə bu söhbət bağlanmalıdır. Dediklərim bəlkə də ağır çıxacaq. Bir qədər məntiqlə düşünmək lazımdır. Mən bunu dediyim üçün sarı vərəqə ilə cəzalandım. Məntiqlə düşünsəydi, orda qırmızı vərəqə artıq idi. Qərəzdir bu, ya yox, kiməsə görə olunub, gələcək oyunlar üçün, ya yox, mən bunu deyə bilmərəm.

- Qırmızı vərəqə ilə bağlı etiraz etmək fikriniz var?

- Çıxan qərara baxacağıq. Elə olub qərarlar dəyişib. İntizam Komitəsi də yəqin epizodu incələyər. Bəlkə heç bizim etiraz etməyimizə ehtiyac qalmayacaq.