Azərbaycan futbolunda ədalət prinsipləri sual altındadır

Azərbaycan Premyer Liqasının 24-cü turunun Şamaxıda keçirilən “Şamaxı“ - Turan Tovuz” oyununda canlı yayımın və VAR sisteminin olmaması futbol ictimaiyyətində ciddi müzakirələrə səbəb olub.

Qarşılaşmadan əvvəl “Turan Tovuz” klubunun bəyanat yayaraq vəziyyətdən narazılığını bildirməsi və AFFA-nın buna sərt reaksiya verməsi Azərbaycan futbolundakı ədalət prinsipləri ilə bağlı yeni suallar doğurur.

Məsələ nədir?

Ölkədə hökm sürən əlverişsiz hava şəraiti səbəbindən Şamaxı şəhərinə texniki avadanlıqların daşınmasında çətinliklər yaranıb və nəticədə “CBC Sport” telekanalı oyunu canlı yayımlaya bilməyib. Bu səbəbdən VAR sistemi də tətbiq edilməyib. AFFA isə verdiyi açıqlamada oyunun keçirilməsi üçün heç bir maneə olmadığını və əsasnaməyə görə canlı yayım və VAR-ın məcburi olmadığını bildirib.

Bununla belə, “Turan Tovuz” klubunun narazılığı sırf texniki problemlərlə bağlı deyil. Klub rəhbərliyi bildirir ki, bütün komandalar üçün bərabər şərait yaradılmalıdır və bəzi matçların canlı yayımlanıb, digərlərinin bu imkandan məhrum edilməsi çempionatın obyektivliyinə kölgə salır.

AFFA-nın sərt reaksiyası

AFFA isə klubların hakimliklə bağlı ictimai şəkildə irad bildirməsini tənqid edərək, “Turan Tovuz”un sübutları varsa, təqdim etməli olduğunu vurğulayıb. Əks halda məsələ AFFA İntizam Komitəsi tərəfindən araşdırılacaq. Lakin burada vacib bir sual yaranır: AFFA klubların haqlı iradlarını dinləmək əvəzinə, onları susdurmağa çalışır?

Beynəlxalq təcrübə nə deyir?

Dünyanın aparıcı futbol çempionatlarında canlı yayımın və VAR sisteminin işləmədiyi hallar çox nadir rast gəlinən vəziyyətlərdir. Məsələn, İngiltərə Premyer Liqasında və ya UEFA-nın təşkil etdiyi yarışlarda bu cür texniki problemlər baş verərsə, ya matç təxirə salınır, ya da oyun sonrası hər iki klubun iştirakı ilə rəsmi açıqlamalar verilir. Azərbaycan futbolunda isə AFFA bu cür problemləri normal hesab edir və klubların narazılığını görməməzliyə vurur.

Futbolun gələcəyi üçün nə edilməlidir?

Məsələnin böyüməsinin əsas səbəbi AFFA-nın dialoq əvəzinə, klubların tənqidini cəzalandırmaqla hədələməsidir. Halbuki Azərbaycan futbolunun inkişafı üçün hakimlik məsələlərində şəffaflıq, bütün oyunların eyni texniki imkanlarla təmin olunmalıdır. Həmçinin AFFA klubların səsini boğmağa yox, onlarla açıq dialoq yolunu seçməlidir.

AFFA-nın burada ən düzgün addımı nə olardı?

Assosiasiya klubların tənqidi fikirlərinə açıq yanaşmalı və problemləri həll etməyə çalışmalı, bu cür çatışmazlıqları aradan qaldırmalı, bu kimi halların yaşanmaması üçün konkret addımlar atmaq barədə düşünməlidir. Həmçinin hakimlik məsələləri və texniki problemlərlə bağlı açıq hesabat təqdim etməklə tənqidləri üzərindən ata bilər.

Əks halda, Azərbaycan futbolunda haqsızlıqlar və narazılıqlar artacaq, çempionatın nüfuzu isə daha da aşağı düşəcək.

TAĞI