Elmar Baxşıyev: “Son nöqtəni qoymaqda sıxıntılarımız var”

“Gərgin oyun oldu. Birinci hissədə oyunumuz alınmadı. "Səbail" təzyiq göstərirdi. İkinci hissədə dəyişikliklərlə təşəbbüsü ələ ala bildik. Zədəli futbolçularımız var. Onlar komandaya qoşulandan sonra hücumda daha rəngarəng olacağıq”.

Futbolxeber.az saytının məlumatına görə, bu sözləri “Araz-Naxçıvan”ın baş məşqçisi Elmar Baxşıyev Azərbaycan Premyer Liqasının XXIV turunda “Səbail”ə qarşı keçirilən oyundan (0:0) sonra deyib.

O, “Araz-Naxçıvan” Ramon Maçado və Felipe Santosdan asılı olması barədə fikri qəbul etməyib: “Belə deməzdim. Miço Kuzmanoviç də zədəli olduğu üçün hücumda çox da rotasiya edə bilmirik. Amma futbolda belə hallara rast gəlmək olur. Daha çox çalışıb nöqsanları aradan qaldırmaq lazımdır”.

E.Baxşıyev Vanderson Melonun mərkəz müdafiəçisi mövqeyində oynamasını məcburi dəyişiklik adlandırıb: “Çünki üçüncü mərkəz müdafiəçimiz Bəxtiyar Həsənalızadə də zədəlidir. Bu dəyişikliyi etməyə məcbur idik. Bu gün oyun quruculuğunda problem yox idi. Sadəcə, son nöqtəni qoymaqda sıxıntılarımız var”.