Vaqif Cavadov: “Penalti 100 faiz idi, vermədilər”

“Neftçi”ni qələbə münasibətilə təbrik edirəm. Onlara uğurlar arzulayıram. Oyundan çox danışmaq istəmirəm. Gedişatı özünüz də gördünüz. İnanıram ki, düzgün və ədalətli məqalələr yazılacaq. Təhlil etsəniz, daha yaxşı olar. Həm hakimlərlə, həm oyunla bağlı... Başqa söz deməyə ehtiyac yoxdur”.

Futbolxeber.az saytının məlumatına görə, bu sözləri “Sumqayıt”ın baş məşqçisi Vaqif Cavadov Azərbaycan Premyer Liqasının XXIV turunda “Neftçi”yə 0:1 hesabı ilə uduzduqları oyundan sonra deyib.

O, gördükləri barədə danışmaq istəməyib: “Gördüyüm var. İndi açıqlasam, ya cəza alacam, ya da intriqaya səbəb olacam. Sizin ədalətli yazılarınızı oxuyuruq. Düzgün analiz edib, oyunumuzla bağlı təhlil edə bilərsiniz. Oyundan razıyam və komandama təşəkkür edirəm. Belə oyunla ancaq irəli... Növbəti matça hazırlaşacağıq. Hər şey yaxşı olacaq”.

Cavadov “Hakimlikdən narazısınız?” sualını belə cavablandırıb: “Təhlili özünüz edin. Mən dediyimi dedim. Son 10 dəqiqəyə nəzər yetirin. Meydanda hansı qərarlar verildi. Özünüz də görəcəksiniz, bizim penalti 100 faiz idi, vermədilər. Hakimlər haqda danışmaq istəmirəm. Uduzmuşuq. Sizdən xahiş edirəm, təhlil edin, qiymət verin. Bəlkə də kimlərsə cəzasını alacaq”.

“Sumqayıt”ın baş məşqçisi komandasının 80-ci dəqiqəyə qədər olan oyununu belə analiz edib: “Qol epizodları "Sumqayıt"da daha çox oldu. Yararlana bilmədik. Daha çox çalışacağıq. 80-ci dəqiqəyə qədər olan epizodlar "Sumqayıt"ın xeyrinə idi”.

O, hava şəraitinin hər iki komanda üçün eyni olduğunu söyləyib: “Planlarımızı heç nə pozmadı. Hazır idik. Bugünkü oyun onu göstərdi ki, hər cəhətdən komandam üstün idi”.

Mütəxəssis əvvəlki oyunlarda komandasının ikinci ilə müqayisədə birinci hissədə üstün görünməsi fikri ilə razılaşıb: “Digər oyunlarda elədir. Amma sonradan meydana buraxdığımız oyunçular hazır gəlməyib. Bəzilərində 1-2 ay keçib. Amma birdən-birə onları yükləsək, yenidən zədələnəcəklər. Ronaldo, Momo Yansane də həmçinin. Bu yöndə çalışırıq. Bugünkü oyunda 90 dəqiqə ərzində pressinq etdik, qol imkanlarımız oldu. Bəzi səbəblərə görə uduzduq. Futboldur. Növbəti matça hazırlaşmalıyıq”.

V.Cavadov son 9 matçda qol vura bilməmələrindən də söz açıb: “Qol vura bilmiriksə, problem var. VAR-da olan hakimlər bəzi epizodları görmürsə... Komandamdan razıyam. Ruhdan düşmürük. Çempionat gərgin keçir. İnanıram ki, vəziyyətdən çıxacağıq”.

O, kubokda "Sabah"ı mübarizədən kənarlaşdırmaq şanslarının olduğunu vurğulayıb: “Birinci oyun göstərdi ki, rəqibi keçə bilərik. Bu gün də yaxşı mübarizə apardıq. "Sabah"la birinci oyun imkan verir ki, mərhələ adlayaq. Hansı komanda uğurlu, istəkli olacaqsa, o da mərhələ adlayacaq. Kubokda qolla bağlı hər şey qaydasında olacaq”.

“Sumqayıt”ın çalışdırıcısı komandasının sonuncu olmaq ehtimalını yaxın buraxmayıb: “Turnir cədvəlinə baxmısınız? Neçənci yerdəyik? "Səbail"in 17 xalı var. Sonuncu yerə düşmək başqa şeydir. İntriqa yaratmayaq. Riskli zonadayıq. Amma bu məğlubiyyətə görə sonda deyilik. Bizim 22 xalımız var. "Şamaxı" da bizi udub keçə bilər. Bizi düşündürən məsələ hər oyundan-oyuna artırmağımız, qol vurmağımızdır. Çalışacağıq ki, nəticə əldə edək”.