Filip Ozobiç: “Vacib olan qələbə idi, onu da qazandıq”

“Neftçi”nin yarımmüdafiəçisi Filip Ozobiç Azərbaycan Premyer Liqasının 24-cü turunda “Sumqayıt”ı 1:0 hesabı ilə məğlub etdikləri oyun barədə danışıb.

Futbolxeber.az saytının məlumatına görə, 34 yaşlı futbolçu matçın çətin keçdiyini bildirib: “Bizim üçün çox vacib oyun idi. Son turlar yaxşı nəticə qazanmamasına baxmayaraq, bilirdik ki, “Sumqayıt” yaxşı komandadır. Gözlədiyimiz kimi, çətin matç alındı. Lakin sonda fərqlənməyə müvəffəq olduq və qalib gəldik”.

Ozobiç qarlı havada oynamağın çətinliyini qeyd etsə də, bildirib ki, şərtlər hər iki komanda üçün eyni idi: “Təbii ki, bu cür hava şəraitində oynamaq çətindir. Amma bu, təkcə bizə yox, həm də rəqibə problem yaradırdı. “Sumqayıt” da eyni şəraitdə mübarizə aparırdı. Vacib olan qələbə idi, onu da qazandıq”.