Bəhlul Mustafazadə: “Zamanla hər şey öz yerinə oturacaq”

“Qarabağ”ın müdafiəçisi Bəhlul Mustafazadənin Futbolxeber.az saytına müsahibəsi

­- Azərbaycan kubokunda 1/4 finalın ilk oyununda “Səbail”ə qalib gəldiniz. 1:0 hesablı qələbəni necə şərh edərdiniz?

- Oyun gözlədiyimiz kimi çətin keçdi. İstər meydan amili, istərsə də rəqib bizə kifayət qədər çətinliklər yaratdı. Sonda qalib gəldik. Lakin düşünürəm ki, daha yaxşı oynaya bilərdik.

- Daha yaxşı oynamağınıza nə mane oldu?

- Bəlkə də hardasa hava amilinin də təsiri oldu. Özünüz də gördünüz ki, küləyin güclü olmağı bəzən hava toplarında çətinlik yaradırdı. Ümumi götürdükdə komandamız yaxşı mübarizə apardı, sona qədər vuruşdu. Çalışacağıq ki, növbəti oyunlarda daha yaxşı təsir bağışlayaq.

- Yəqin razılaşarsınız ki, komandanız hazırda ideal formada deyil, hər zamankı əzəmətli “Qarabağ”a görmürük. Bunun səbəbi nədir?

- Avroliqadakı çıxışımızın da buna təsiri ola bilər. Buna baxmayaraq, toparlanmağa çalışırıq və daha yaxşı vəziyyətə gələcəyimizi bilirik. Qarşıda bizi çempionat oyunları, eləcə də kubokda cavab matçı gözləyir. Düşünürəm ki, zamanla hər şey öz yerinə oturacaq.

- Sizə elə gəlmir ki, “Qarabağ” Avroliqadakı çıxışına görə həddindən artıq çox tənqid olundu. Sanki hər il yarımfinala kimi gedirdi komanda, bircə bu il pley-offa düşə bilmədi...

- Bəlkə də bunda keçənilki nəticənin rolu var. Hamı ümid edirdi ki, “Qarabağ” yenə də həmin nəticələri təkrarlayacaq. Təəssüflər olsun ki, belə alındı. Əlbəttə, biz də istəməzdik ki, bu cür olsun nəticələr. Amma fərqindəyik ki, bu idmandır. Pis çıxışımızdan nəticə çıxardıb, gələn mövsüm daha yaxşı olacağımıza əminik.

- Legioner limitinin ləğvi barədə fikirləriniz necədir? Bu, futbolumuzun xeyrinə olacaq, yoxsa ziyanına?

- Açığı, mənim üçün dəqiq fikir demək çətindir. Çünki hər iki halda müəyyən arqumentlər gətirmək olar. Bu qərarın futbolumuza faydalı olub-olmayacağını zaman göstərəcək. Bəlkə yerli futbolçular da hardasa işlərinə əvvəlkindən daha məsuliyyətli yanaşmağa çalışacaqlar. Amma dediyim kimi, indi konkret proqnoz vermək, fikir bildirmək çətindir. Mənfi də ola bilər, müsbət də. Bəlkə də yerli futbolçuların xaricə üz tutmasına gətirib çıxacaq.

- Sizcə, bu, nə dərəcədə realdır?

- Zaman göstərəcək. İndidən nəsə demək çətindir.

İbrahim Cəfərov