“Turan”ın legioneri: “Əldə etdiyimiz uğur əzmkarlığın nəticəsidir”

“Qələbə qazanmaq çox çətin oldu. Düşünürəm ki, əldə etdiyimiz uğur fərdi performansın deyil, bütün komandanın əzmkarlığının nəticəsidir”.

Futbolxeber.az saytının məlumatına görə, bu sözləri CEV Çempionlar Liqasının III təsnifat mərhələsinin ilk oyununda Bolqarıstanın “Maritza Plovdiv” klubunu 3:0 hesabı ilə məğlub edən “Turan” komandasının voleybolçusu Yanq Hanyu deyib.

O, növbəti oyunda da qələbə qazanmağa ümid etdiklərini bildirib: “İnanıram ki, doğma meydanda keçiriləcək cavab görüşündə də qalib gələ biləcəyik. Hazırda çox həyəcanlıyam və hisslərimi ifadə etməkdə çətinlik çəkirəm. Çox xoşbəxtəm. Ümid edirəm ki, növbəti oyunda heyətimiz tam olacaq. Bütün komanda üzvlərinin bir araya gələrək mübarizə aparması məni sevindirir. Komanda yoldaşlarıma təşəkkür edirəm”.

Qeyd edək ki, komandalar arasında cavab görüşü noyabrın 10-da keçiriləcək.