Anatoli Ponomaryov: “Avropada bu komandaya getmək istəyirəm” deməklə iş bitmir”

Milli komandamızın keçmiş futbolçusu Anatoli Ponomaryovun Futbolxeber.az saytına müsahibəsi

- Bu yaxınlarda Bakıda keçirilən FİFA U-15 dünya çempionatı və festivalını canlı izlədiniz. Yarışla bağlı təəssüratlarınız necə oldu?

- Hazırda FİFA agenti kimi çalışdığım üçün dostum və həmkarım, tanınmış futbolçu Sergey Milinkoviç-Saviçin qardaşı ilə birgə Bakıya səfər etdim. Maraqlı yarış alındı. Gərgin oyunlara şahidlik etdik. Təşkilatçılıq da yüksək səviyyədə idi.

- Yarışda Azərbaycan millisinin də oyunlarını izlədiniz. Komandada perspektiv futbolçular var? Hansısa oyunçu diqqətinizi çəkdi?

- Bəli, belə oyunçular var. Ad çəkmək istəməzdim. Amma başa düşmək lazımdır ki, "Avropada bu komandaya getmək istəyirəm" deməklə iş bitmir. Bakıda keçirilən dünya çempionatında 3 min futbolçu mübarizə aparırdı. Onların hansınsan soruşsanız, hamısı eyni cavabı verəcək. Hər bir 15 yaşlı futbolçu gələcəkdə Avropada oynamaq istəyir. Amma bunun üçün ilk növbədə gedəcəyin ölkədəki futbolçulardan 2-3 dəfə güclü olmalısan. Digər tərəfdən azərbaycanlıların Avropa pasportu da yoxdur. Belə olanda, Avropa klubları üçün azərbaycanlı futbolçunun transferi daha da çətinləşir. Ən yaxşı halda, onları 18 yaşında heyətinə qata bilir. Bəzən elə olur ki, 18 yaşına çatmamış afrikalıları baxışa çağırırlar, baxırlar. 18 yaşı olanda isə həmin kluba keçirlər.

- Bəs Azərbaycan futbolu ilə maraqlanmağa vaxtınız olur?

- Bəli, baxıram. Bakıda olarkən "Sabah" - "Qarabağ" matçını stadiondan izlədim. Qol vurulmasa da, maraqlı oyun oldu. Avrokuboklarda "Qarabağ"ı da, “Sabah”ı da izləyirəm.

- Vaxtilə formasını geydiyiniz Azərbaycan millisinin hazırkı vəziyyəti barədə nə düşünürsünüz? Millətlər Liqasında D divizionundayıq, üstəlik, Bakıda Lixtenşteyni belə məğlub edə bilmədik...

- Düzü, mənim üçün nəsə demək çətindir. Çünki yığmanın oyunlarını yaxından izləməmişəm. O qədər işlərim olur ki... Müxtəlif ölkələrə gedirik, gənc futbolçuların transferi ilə məşğul oluruq.

- Bəs Azərbaycanın əsas millisində Avropa klublarına təklif edə biləcəyiniz futbolçu var?

Bilmirəm.

- Yəni heç bir azərbaycanlı futbolçu ilə işləmirsiniz?

Xeyr, çalışmıram.

- Millimizin və “Qarabağ”ın hücumçusu Musa Qurbanlı İsveçə yollanmışdı, "Yurqorden"də forma geyindi. Sizcə, Musanın karyerası orada niyə uğurlu alınmadı?

- Məncə, Musa "Yurqorden"ə çətin anda gəlmişdi, uyğun vaxt deyildi. Bəzən şans yanında olmalıdır, komanda da yaxşı oynamalıdır ki, sən də relsə düşəsən. Amma Musa gəldiyi vaxtda Azərbaycanda fasilə idi, İsveçdə isə mövsüm gedirdi. "Yurqorden"in hücumçusu yox idi, dərhal onu oynatmağa başlatdılar. Komanda qalib gələ bilmirdi, Musa da qol vurmurdu. O zaman çox şey neqativ olur. Ancaq başqa şəraitdə, başqa vaxtda gəlsəydi... Məsələn, "Yurqorden" qələbələr qazansaydı, komandanın başqa hücumçusu olsaydı, Musa yavaş-yavaş oynamağa başlayıb, komandaya öyrəşsəydi, bəlkə də hər şey başqa cür alınacaqdı. Ümumilikdə, Musanın özünü pis göstərdiyini demək olmaz. Sadəcə Musa "Yurqorden"ə uyğun vaxtda gəlməmişdi. Yoxsa, Musanın yaxşı futbolçu olduğunu düşünürəm.