Ronaldo Portuqaliya millisinə vida etdi

Portuqaliya millisinin və Səudiyyə Ərəbistanının “Əl-Nəsr” klubunun hücumçusu Kriştiano Ronaldo yığmadakı karyerasını başa vurduğunu açıqlayıb.

Futbolxeber.az saytının məlumatına görə, 41 yaşlı futbolçu bu barədə sosial şəbəkə hesabında paylaşım edib.

“Portuqaliya həmişə mənim bir parçam olaraq qalacaq. 23 ildir ki, bu formanı geyinmək, onu qorumaq və ölkəni dünyanın müxtəlif stadionlarında təmsil etmək şərəfinə və məsuliyyətinə sahibəm. Bu gün estafeti gələcək nəsillərə ötürməyin vaxtıdır", - deyə Ronaldo yazıb.

Qeyd edək ki, Kriştiano Ronaldo millidə debütünü 2003-cü il avqustun 20-də Qazaxıstanla yoldaşlıq görüşündə edib. O, Portuqaliya yığmasının heyətində 234 oyun keçirib, 146 qol vurub və 45 məhsuldar ötürmə verib. O, millidəki həm oyun, həm də qol sayında dünya rekorduna imza atıb.

Ronaldo milli ilə 2016-cı ildə Avropa çempionu, 2018/2019 və 2024/2025 mövsümlərində isə Millətlər Liqasının qalibi olub.