Ayxan Abbasov: “Orta büdcəli klubların buna risk edib-etməyəcəyi sual altındadır”

“Şamaxı”nın baş məşqçisi Ayxan Abbasov Azərbaycan Premyer Liqasında komanda sayının artırılmasına münasibət bildirib.

Futbolxeber.az saytına müsahibəsində o, bu qərarı çox yaxşı qarşıladığını bildirib: “Komanda sayının artırılması çox yaxşı haldır. İnanıram ki, gələcəkdə bu say daha da artacaq. Çünki neçə illərdir futbol azarkeşləri, futbol ictimaiyyəti komanda sayının artırılmasını istəyirdi. Xüsusən də bu klublar bölgəni təmsil etsə, daha da sevindirici olacaq. Çünki görürük ki, “Turan Tovuz”un, “Kəpəz”in, “Şamaxı”nın gəlişi çempionata rəng qatıb. Həm azarkeş, həm də bölgədəki uşaq futbolu baxımından. Bir sözlə, bu qərara sevinirəm, çox sağ ol deyirəm. Çünki komanda sayının artması həm də dövlət tərəfindən ayrılan maliyyə vəsaitinin artması deməkdir. Sağ olsunlar ki, belə qərar qəbul etdilər”.

Yeni mövsüm üçün çempionatda komanda sayı artırılsa da, hələlik format açıqlanmayıb. Mütəxəssis bunu ciddi problem hesab etmədiyini vurğulayıb: “Hələ vaxta var. Yəqin ki, yaxın günlərdə formatla bağlı da rəsmi açıqlama veriləcək. Onsuz da iki formatdan biri seçiləcək. Ya 3 dövrə, ya da 2 altılıq olacaq. Yeni mövsümün başlanmasına hələ var, ona görə də bu, qlobal problem deyil. Əsas odur ki, komandalar indidən gələn mövsümdəki limitin necə olacağını bilirlər”.

“Formatla bağlı qeyri-müəyyənlik liqada qalmaq uğrunda mübarizə aparan klubların qarşıdakı turlardakı çıxışına necə təsir göstərəcək?” sualını A.Abbasov belə cavablandırıb: “Məncə, təsir etməyəcək. Çünki görürük ki, çempionatımızda gərgin mübarizə gedir. Həm avrokuboklar, həm də Premyer Liqada qalmaq uğrunda. Heç kim sonuncu olmaq istəmir. Necə deyərlər, hər kəs öz işi ilə məşğuldur. Ona görə də hər hansı təsir göstərəcəyini düşünmürəm”.

“Şamaxı”nın baş məşqçisi legioner limitinin ləğvindən də söz açıb: “Burda legioner limitindən əlavə, qoyulan qaydalar da önəmlidir. Komanda sayı da artırılıbsa, deməli, yerli futbolçulara yenə ehtiyac olacaq. İnanıram ki, bu qərar həm də yeni gənclərin üzə çıxmasına kömək edəcək. Digər tərəfdən 12 legionerdən sonra rüsum çoxalır və orta büdcəli komandaların buna risk edib-etməyəcəyi sual altındadır. Eləcə də stimul var ki, yerli futbolçulara şans verən klublar bundan pul qazanacaqlar. Düzdür, qərarın detalları hələlik məlum deyil. Yəqin bu da yaxın günlərdə açıqlanacaq. Bunun özü də bir stimuldur. Sərxan Hacıyevin dediyinə görə, gənc futbolçuları oynadanda nəzərdə tutulan bonus ikiyə vurulacaq. Əlbəttə, belədə gənc futbolçuları üzə çıxardan komandalar əlavə pul qazanacaqlar. Ümumən artıq qərar verilib və artıq buna köklənmək lazımdır. İnanıram ki, nə olursa olsun, hər kəs Azərbaycan futbolunun, çempionatımızın inkişafını istəyir”.   

İbrahim Cəfərov