Qorka Larussa: “Əziyyətimiz yerdə qalmadı”

“Səbail”in ispan yarımmüdafiəçisi Qorka Larussanın Futbolxeber.az saytına müsahibəsi

- “Kəpəz”lə oyunda vacib 3 xal qazandınız. Minimal hesablı qələbəni necə şərh edərdiniz?

- Həftə boyu bu oyuna hazırlaşmışdıq. Məşqlərdə çox yaxşı çalışırdıq. Həftə ərzində keçdiyimiz hazırlığın bəhrəsini gördük. Əziyyətimiz yerdə qalmadı. Çox yaxşı oyun keçirdik və layiqli qələbə qazandıq.

- Demək olar ki, ötən turda qazanılan qələbə “Səbail”ə əlavə ruh-yüksəkliyi vermişdi?

- Bəli. Çünki qələbə qazanada növbəti matça daha ciddi hazırlaşırsan. Üstəlik, gördüyün işin bəhrəsi olanda daha ürəklə çalışırsan.

- 90 dəqiqə ərzində “Səbail” xeyli qol şansını boşa verdi. Bunu nə ilə əlaqələndirmək olar?

- Buna normal yanaşıram. İkinci hissədə rəqib çox təzyiq edirdi. Buna görə də bir qədər yorulmuşduq. Belədə əks-hücumlara bel bağlayırdıq. Fərqlənmək üçün şanslarımız da var idi. Təbii ki, 2, 3, yaxud 4:0 hesabı ilə qalib gəlsəydik, daha yaxşı olardı. Lakin ikinci qolu rəqib qapısından heç cür keçirə bilmədik.

- Qol epizodlarını qaçıranda düşünmürdünüz ki, futbolun yazılmayan qanunu işə düşəcək və rəqib sizi cəzalandıracaq...

- Xeyr. Müdafiədə yaxşı çıxış edirdik. Düzdür, rəqib çox təzyiq edirdi, lakin sona yaxın demək olar ki, 100 faizlik qol epizodları olmadı.

- Ardıcıl iki qələbənin ardını gətirmək mümkün olacaq?

- Bunu hamımız arzulayırıq. Məşqlərdə daha çox çalışırıq. İnanıram ki, növbəti matçlarda qələbə seriyasını davam etdirəcəyik. İndiki məqamda bizim üçün qazanılan hər 3 xal çox vacibdir.

- Növbəti turda səfərdə “Turan Tovuz”un qonağı olacaqsınız. Həmin matçdan gözləntiləriniz nədir?

- “Turan Tovuz” güclü rəqibdir. Ona görə də bizi çox çətin səfər matçı gözləyir. Rəqibin heyətində çox yaxşı futbolçular var. Lakin təslim olmayacağıq, sona qədər mübarizə aparacağıq. Bizim meydançamız kimi, Tovuz stadionunun da ot örtüyü sünidir.

- Süni qazon demişkən, əksər futbolçular bu cür meydançalarda oynamaqdan narazılıq edirlər. Siz də eyni fikirdəsiniz?

- Əlbəttə, mən də təbii qazonda oynamağın tərəfdarıyam. Heç kim istəməz ki, süni meydançada oynasın. Çünki bu halda zədə almaq ehtimalı yüksək olur.

İbrahim Cəfərov