AFFA-nın ilk uğuru - TƏBRİKLƏR!

AFFA-nı tez-tez tənqid edirik. Düzdür, tənqidlərimizin hamısı haqlı, yerində olsa da, arada assosiasiyanın yaxşı işlərindən də yazmaq lazımdır. Özü də nəzərə alsaq ki, bu cür işlər ildə-ayda bir dəfə olur. Odur ki, bu günlərdə eşitdiyim bir xəbərə görə AFFA rəhbərliyini ürəkdən təbrik edirəm.

Sevincimi sizinlə də bölüşüm. Apreldən etibarən Azərbaycan futboluna rəhbərlik edən şəxslər nəhayət ki, aylar sonra ilk uğura imza atdılar. Belə ki, ötən ildən təmirə qapadılan Binə stadionu nəhayət ki, aylar sonra hazır vəziyyətə gətirildi.

Bəli, adətən bu cür işlər maksimum 1-2 ay çəkir. AFFA isə düz 8 aya bunu bacardı. Nə olsun ki, müddət həddindən artıq çox oldu. Nəzərə alın ki, stadion 8 aya deyil, 18 aya da hazır vəziyyətə gətirilə bilərdi. Yəni ki, indiki AFFA-dan nə desən, gözləmək olar. Odur ki, naşükür olmağa dəyməz. Bir təbriki AFFA rəhbərliyindən əsirgəmə, əziz oxucu.

Başa düşürəm, bəlkə də ürəyində deyirsən ki, bir stadionu 8 aya təmir edib ortaya çıxaranlardan necə futbolumuzun inkişafını gözləmək olar? Hətta ola bilər düşünürsən ki, 1-2 aylıq işi 4 dəfə gec müddətə ortaya çıxaranlar strategiyadan necə baş çıxaracaqlar? Düzdür, haqlısan. Amma pessimist olmağa dəyməz.

İnanırıq ki, indiki AFFA rəhbərliyinin uzaqgörən siyasəti nəticəsində yaxın 8 ildə Azərbaycan millisi biabırçı şəkildə yuvarlandığı UEFA Millətlər Liqasının ən aşağı divizionundan daha yuxarı - C Liqasına vəsiqə qazanacaq. Ümid edirik ki, 8 ay da olmasa, 8 ildə futbolumuz inkişaf edəcək. Gülmə, əziz oxucu. Görüş filmində necə deyir, “lağ eləmə, bala, lağ eləmə”...

P.S. Maraqlıdır ki, arenanın meneceri Emil Hacızadə 2024-cü il oktyabrın 22-də ölkə mətbuatına verdiyi açıqlamada “Binə qəsəbə stadionundakı iş başa çatmaq üzrədir. Hava şəraiti ilə əlaqədar ayın sonunda bitəcəyini gözləyirik” demişdi. Ayın sonu, yəni ki, oktyabrın sonu. İndi isə 2025-ci ildir, yanvarın sonu...

Hə, nə olsun ki, Binə qəsəbə stadionundan I, II və Əvəzedicilər Liqası, həmçinin aşağı yaş qrupu üzrə komandalar istifadə edir. Əsas odur ki, legioner limiti ləğv olunsun...

Futbolxeber.az