Ukraynada oynayan futbolçu Azərbaycan klublarından təklif alıb

Azərbaycan millisinin "Polesya"da (Ukrayna) oynayan üzvü Emil Mustafayev klubunu dəyişə bilər.

Futbolxeber.az saytının məlumatına görə, bu barədə Ukrayna mediası yazıb.

Bildirilib ki, Odessanın "Çernomorets" klubu 22 yaşlı yarımmüdafiəçini icarəyə götürməyi nəzərdən keçirir. Lakin bu, kluba tətbiq edilən transfer qadağası aradan qaldırıldıqdan sonra mümkün ola bilər.

Həmçinin xəbərdə qeyd olunub ki, Emilə Azərbaycan klublarından da təklif gəlib. Mustafayevin artıq həm Azərbaycan millisində, həm də Ukrayna klublarında təcrübəsi var ki, bu da onu bir neçə komanda üçün cəlbedici namizədə çevirir.

Qeyd edək ki, Emil ötən ilin mart ayından Azərbaycanın əsas millisində oynamağa başlayıb. O, klub karyerasında isə daha əvvəl Ukraynanın "Oleksandriya" komandasının formasını geyinib. Mustafayev cari mövsümdə "Polesya"nın heyətində 12 matça çıxıb, 1 qolun ötürməsini verib.