Bir kluba qurban verilən milli

Son günlər Azərbaycan futbolunda əsas müzakirə mövzularından biri də Premyer Liqamızdakı legioner limitinin ləğvidir. Əslində, bu cür müzakirələr, söhbətlər əvvəlki illərdə də olub. Lakin görünən odur ki, bu dəfə məsələ daha ciddidir.

Sonuncu belə təşəbbüs təxminən iki il əvvəl “Sabah”ın sabiq baş məşqçisi Murad Musayevdən gəlmişdi. Çempionatda “Qarabağ”la mübarizə aparmağın mümkünsüzlüyünü anlayan rusiyalı mütəxəssis çıxış yolunu məhz legioner limitinin ləğvində görmüşdü. Əslində, bu, başadüşüləndir. “Qarabağ”ın ölkə daxilindəki rəqiblərini birbaş üstələməsinin səbəblərindən biri də məhz legioner limitidir. Reallıq odur ki, “Qarabağ” yerli futbolçuların ustalıq səviyyəsinə görə digər rəqiblərini bir yox, ən azı 2-3 dəfə üstələyir. Ölkədəki ən yaxşı yerli oyunçuların əksəriyyəti məhz Ağdam klubunda cəmləşib. 

İki il əvvəl Murad Musayevin istəyinin reallaşmasına o vaxtkı AFFA rəhbərliyi icazə verməmişdi. Lakin Murad Musayev indi “Sabah”da olmasa da, onun klub rəhbər(lər)i hazırda AFFA İcraiyyə Komitəsində yer alır(lar). Heç kimə sirr deyil ki, Balakişi Qasımov-Maqsud Adıgözəlov tandemi (xüsusən də birinci) bu gün İcraiyyə Komitəsində əsas söz sahiblərindəndirlər. Böyük ehtimalla, limitin ləğvi təklifi də məhz “Sabah” rəhbərliyindən gəlib.

Əgər limit ləğv olunsa, bu, milli komandamızın bir klubun - “Sabah”ın maraqlarına qurban verilməsi deməkdir. Halbuki son Millətlər Liqasında biabırçı çıxışla yadda qalan millimizin vəziyyəti onsuz da bərbaddır. Limitin ləğvi isə yığmamızın birdəfəlik məhvi demək olacaq. Çünki limit ləğv olunsa, bu gün məcburən hər tur meydana çıxan 40 azərbaycanlı futbolçunun ən azı yarısı yaxın gələcəkdə heyət üzünə həsrət qalacaq. Bu isə avtomatik olaraq millinin potensial üzvlərinin sayının yarıbayarı azalması deməkdir.

Son günlər bu barədə istər rəsmi, istərsə də qeyri-rəsmi söhbətlərdə həm mütəxəssislər, həm də futbolçular həyəcan təbili çalırlar. Amma xeyri olacaqmı? İndi əsas sual budur.

Həqiqətənmi düşünürsünüz ki, “Sabah”ın çempion olması üçün Azərbaycan millisini qurban verməyə dəyər? Dəyməz, inanın ki dəyməz. Bəli, limitin ləğvi klublarımızın güclənməsinə, avrokuboklarda daha yaxşı çıxış etməsinə səbəb ola bilər. Lakin unutmayaq ki, istənilən ölkənin millisi klublardan daha önəmlidir! Milli komandanı kimlərinsə marağına qurban vermək olmaz!

Futbolxeber.az