Polşada çıxış edən həmyerlimiz: “Böyük liqalarda oynamaq ən böyük hədəfimdir”

Bu gün çox az sayda azərbaycanlı futbolçu legioner həyatı yaşayır. Renat Dadaşov, Mahir Emreli, Coşqun Diniyev, Rahil Məmmədov və digər milli üzvlərindən fərqli olaraq elə həmyerlilərimiz var ki, aşağı liqalarda çıxış etdikləri üçün daim diqqətdən kənarda qalırlar. Ona görə də 31 Dekabr - Dünya Azərbaycanlılarının Həmrəylik Günündə Futbolxeber.az saytı olaraq bu cür futbolçulardan biri - Həsən Hüseynlə söhbətləşmək qərarına gəldik. Elə də geniş publikaya tanış olmayan 19 yaşlı H.Hüseyn bu idman növündə ilk addımlarını vətəndə atıb. Daha sonra isə Polşaya üz tutub və bu ölkənin əvvəlcə həvəskar, indi isə aşağı liqa klubunda forma geyir. Qalanını isə gəlin öz dilindən eşidək.

- Futbola 4-5 yaşımdan marağım və sevgim olub. İlk addımlarımı “Sabahın ulduzları”nda atmışam, orda oynamışam. Sonra bir müddət çimərlik futbolunda çıxış etdim. Ardınca isə futbola olan sevgim məni "Neftçi"yə, daha sonra “Sabah”a gətirdi və 3 il bu klubda forma geydim.

- Polşaya gedişiniz necə alındı?

- 2020-ci ildə koronavirus pandemiyası dövründə Polşaya köçdüm. Buraya həm təhsil almaq, həm də futbol karyeramı davam etdirmək məqsədilə gəldim. Lakin pandemiya və bəzi bürokratik çətinliklər səbəbindən o vaxt peşəkar futbol oynamaq üçün FİFA qeydiyyatı əldə edə bilmədim. Bu da mənim rəsmi oyunlarda iştirak etməyimə mane olduru. Buna baxmayaraq, stabil məşqlərimi davam etdirdim və universitet komandasında oynadım, səylə çalışdım və həm meydanda, həm də meydandan kənarda bacarıqlarımı inkişaf etdirməyə fokuslandım. Təxminən 3 il bizim futbol dili ilə desək, Region liqasında çıxış edən Poznan şəhərinin “TPS Vinoqradi” klubunda forma geydim. 2024-cü ildə həm Poznandan Varşavaya köçdüm, həm də lisenziya məsələsi həll olundu. Hazırda 4-cü liqa təmsilçisi “Drukaç”da çıxış edirəm, təxminən 6-7 qola imza atmışam. 

- Bildiyim qədər bir müddət İspaniyada da olmusan, hətta deyəsən, millimizin son toplanışına çağırılan “Araz-Naxçıvan”ın yarımmüdafiəçisi Mustafa Əhmədzadə ilə bir klubda da oynamısınız. Düzdür?

- Mustafa ilə İspaniyada yox, Bakıda bir komandada oynamışıq. Onunla çox yaxşı münasibətimiz var. Bu gün də tez-tez əlaqə saxlayırıq.

- Ümumiyyətlə, Polşada potensial necədir? İrəli getmək üçün şans var?

- Dediyim kimi, hazırda “Drukaç”da çıxış edirəm. Düzdür, klubumu dəyişə, səviyyəcə bir qədər yüksək liqada da çıxış edə bilərdim. Lakin aldığım təkliflər əyalət klublarından idi. Mənsə Varşadavada qalmağa üstünlük verdim.