“Neftçi”nin mətbuatdan qaçışı...

“Neftçi” səfərdə “Sumqayıt”a uduzmaqla mövsümdə 7-ci məğlubiyyətini aldı. 16 turdan sonra komandanın aktivində cəmi 13 xal var. Turnir cədvəlinə əsasən demək olar ki, “ağ-qaralar” “Kəpəz” və “Səbail”lə birgə Premyer Liqada qalmaq uğrunda mübarizə aparır. Halbuki belə olmamalıdır...

Klub rəhbərliyi komanda üçün hər cür şərait yaradıb. Gəl ki, meydanda bunun əksini görürük. Görəsən, bu biabırçılıq nə vaxta qədər davam edəcək?

“Sumqayıt”a məğlubiyyətdən sonra “Neftçi”nin futbolçularına ən azı bu sualı ünvanlamaq istəyirdik. Lakin  “miks zona”da nə qədər dayansaq da, gözümüz yollarda qaldı... Düşündük ki, legionerlər bir yana, heç olmasa komandanın kapitanı Rza Cəfərov, yaxud hazırkı heyətdə ən uzun müddət çıxış edən Rəhman Hacıyev mətbuat önünə çıxıb hesabat verər. Ən azı əvvəlki oyunlarda olduğu kimi, yenə də “yaxşı olacaq”, “növbəti turdan şirə dönəcəyik” “nağıl”ları ilə “yola verərlər”. Gəl ki, bu dəfə “Neftçi”nin futbolçuları çıxış yolunu mətbuatdan yan gəzməkdə gördülər. Görünür, artıq onlar da başa düşürlər ki, sözlərinin kəsəri yoxdu. Eynən “Neftçi”nin meydandakı hücumları kimi...

Fərəc Aslanov