Taksi sürücüsünün üsyanı: “Neftçi”nin formasının haqqını verin!

Dünən “Səbail” - “Araz-Naxçıvan” oyunundan çıxıb həmkarlarım - Mirbağır Cəfərli və Mehman Süleymanovla birgə taksi ilə evə qayıdırdıq. Təbii ki, bir maşında 3 idman jurnalisti varsa, söhbət yalnız futbol ola bilər. “Əl Oyunları”na çatanda ortayaşlı taksi sürücüsü də bizə qoşuldu.

- Belə görürəm, futbol sahəsində çalışırsınız. Olar sizə bir sual verim?

- Əlbəttə, buyurun.

- “Neftçi” niyə bu vəziyyətdədir?

Bu sualdan sonra söhbətimiz daha da qızışdı. Necə deyərlər, trio çevrildi oldu kvartet. Hərə öz fikrini dedi. Bizim cavablarımızın sürücünü nə qədər qane edib-etmədiyini bilmirəm, amma bildiyim odur ki, yol yoldaşımızın ürəyi dolu idi.

Məlum oldu ki, sürücü qatı “Neftçi” azarkeşidir və komandanın indiki durumu onun üçün əməlli-başlı ürək ağrısına çevrilib: “Bəzən elə olur ki, “Neftçi”nin oyunundan sonra oturduğum yerdən ayağa qalxa bilmirəm. Yalnız evdəkilərin verdiyi ürək dərmanını içəndən sonra özümə gəlirəm. “Neftçi” mənim üçün dərdə çevrilib. Nəyə görə “Neftçi” bu gün 7-8-ci yerlərdədir? Bu, biabırçılıqdır”.

Həmsöhbətimiz dedi ki, “Qarabağ”dan alınan sonuncu məğlubiyyətdən sonra 5-6 gün keçsə də, hələ də özünə gəlməyib: “Mən başa düşə bilmirəm. Necə bu cür acizanə şəkildə uduzmaq olar? Sanki futbolçular meydana gəzməyə çıxıblar. Belə görünür ki, məğlubiyyət heç veclərinə də deyil. Niyə geydikləri formanın haqqını vermirlər? “Neftçi”nin adını, dəyərini dərk etmirlər. Kim ki meydanda canını qoymur, komandadan qovmaq lazımdır. Qoy 18-19 yaşlı cavanlar oynasın. Bilək ki, heç olmasa gələn il Samir Abasov normal komanda quracaq. Vallah “Neftçi” bizi xəstə edib...”

Bayıldan “Xalqlar dostluğu”na qədər bir xeyli söhbət etdik. Ağsaqqal ürəyini boşaltdı, biz də dinlədik. Bütün danışdıqlarımızı yazıb sizi yormaq istəmirəm. Qısa onu deyim ki, bir daha əmin oldum - “Neftçi” bu ölkənin flaqmanıdır. Bu gün komandanı stadionda cəmi 300-500 nəfər dəstəkləsə də, ekran qarşısında “Neftçi” üçün ürəyi yananların sayı on yox, yüz minlərlədir. Və komandanın indiki durumu həmin insanlar üçün ürəkağrısıdır. Kaş ki “Neftçi”nin futbolçuları geydikləri formanın dəyərini anlaya, haqqını verərdilər. Onlar “Neftçi”ni həmin sürücünün sevdiyinin çox demirəm, əllicə faizi qədər sevərdilər. Bax onda əsl “Neftçi”ni görərdik...

İbrahim Cəfərov