Mateuş Koxalski: "Bu matçda heç-heçə pis yox, yaxşı nəticədir"

“Rəqib çox yaxşı oynadı. Azərbaycan çempionatında hər komanda yaxşı mübarizə aparır. Lakin “Sabah” ən güclülərdən biridir”.

Futbolxeber.az saytına açıqlamasında bu sözləri “Qarabağ”ın qapıçısı Mateuş Koxalski Azərbaycan Premyer Liqasının 16-cı turunda “Sabah”la bərabərə qaldıqları (1:1) oyun barədə danışarkən deyib.

Polşalı qolkiper bildirib ki, bu matçda 1 xal komandası üçün pis nəticə deyil: “Çox çətin oyun keçdi. Rəqib yaxşı mübarizə apardı. Təbii ki, biz hər matçda qalib gəlmək istəyirik. Lakin bu matçda heç-heçə pis yox, yaxşı nəticədir”

24 yaşlı futbolçu üç gündən bir meydana çıxmağın çətinliyindən də söz açıb: “Təbii ki, sıx qrafikdə oynamaq asan deyil. Üstəlik, zədəlilərimiz də var. İndiki məqamda heyətimiz geniş deyil. Bununla belə, əlimizdən gələni edirik. Müəyyən qədər də üç gündən bir oynamağa öyrəşmişik. Lakin istənilən halda çətindir. Mən qapıçıyam, heç bir problem yoxdur, üç gündən bir rahat oynayaram. Amma meydan oyunçuları üçün bu, heç də asan deyil”.

Koxalski UEFA Avropa Liqasının altıncı turu çərçivəsində səfərdə “Elfsborq”a qarşı keçirəcəkləri matçda qələbə üçün meydana çıxacaqlarını söyləyib: “İndi elə vəziyyətdəyik ki, Avropa Liqasında hər növbəti oyunu udmalıyıq. Son 3 matça çıxacaq. Bu turnirdə yolumuza davam etmək, növbəti mərhələyə adlamaq istəyirik. Ona görə də hər matçda 3 xal bizim üçün çox vacibdir. “Elfsborq”la görüş də istisna təşkil etmir. Rəqib hər nə qədər güclü olsa da, məqsədimiz səfərdə qələbə qazanmaqdır”.

Fərəc Aslanov