Yassin Benzia: “Sabahkı matç mənim üçün xüsusi əhəmiyyət daşıyır”

“Daha əvvəl formasını geydiyim “Lion”a qarşı oynamaq maraqlı olacaq. İndi "Qarabağ"ın üzvüyəm. Sabahkı matç mənim üçün xüsusi əhəmiyyət daşıyır”.

Futbolxeber.az saytının məlumatına görə, bu sözləri “Qarabağ”ın yarımmüdafiəçisi Yassin Benzia sabah UEFA Avropa Liqasının 5-ci turu çərçivəsində "Lion"la qarşı keçiriləcək oyundan öncə təşkil edilən mətbuat konfransında deyib.

O, əvvəlki ilə indiki "Lion" arasında çox böyük fərq olduğunu bildirib: “Klub prezidentləri də dəyişib. Mən oynadığım zaman yüksək performans göstərirdik. Ancaq indiki "Lion" da çox yüksək səviyyəli komandadır”.

Fransız yarımmüdafiəçi "Qarabağ"da oynamağın üstünlüyündən də söz açıb: “Bizim üçün "Qarabağ" sözünün mənası xüsusi əhəmiyyət daşıyır. Bu klubun formasını geyinmək, şərəfini qorumağa çalışırıq. Xüsusi deyəndə müharibəyə görə "Qarabağ"ın Bakıda yerləşməsini nəzərdə tuturam”.

Benzia sabahkı matçda sona qədər mübarizə aparacaqlarını vurğulayıb: “Ən yaxşı şəkildə hazırlaşmışıq. "Qarabağ"ın adı xüsusi mahiyyət daşıyır deyə, sona qədər mübarizə aparacağıq. "Lion"u tərk etdikdən sonra sabiq komandama qarşı 3-4 dəfə çıxış etmişəm”.