Veteranlar İttifaqının sədrindən Balakişi Qasımova cavab: “Şərait yaradılmalıdır”

AFFA-nın vitse-prezident Balakişi Qasımov bu günlərdə verdiyi müsahibədə futbolumuzun hazırkı durumda olmasına görə veteran futbolçuları günahlandırmışdı. Bəs görəsən, Veteranlar İttifaqının sədri Oqtay Abdullayev bu barədə nə düşünür?

Futbolxeber.az saytına açıqlamasında O.Abdullayev B.Qasımovun fikirləri ilə tanış olduğunu bildirib: “Bir çox veteranlar mənə bu məsələ barədə mövqeyimi bildirmək üçün müraciət ediblər. Əvvəla onu deyim ki, müsahibə ilə tanışam. Balakişi Qasımova böyük hörmətim var. Lakin təəssüflər olsun ki, o, bəzi məsələləri bilmir. Məsələn, yaxın keçmişdə Veteranlar İttifaqı olaraq toplantı keçirdik. Həmin toplantıda Azərbaycan futbolunun inkişafı üçün müəyyən qərarlar qəbul etdik. Bütün bunları yazılı şəkildə AFFA-nın keçmiş rəhbərliyinə təqdim etdik. Təbii ki, futbolumuzun hazırkı durumu bizi qane edə bilməz. Keçmiş AFFA rəhbərliyi bizim təklif və tövsiyələrimizi yüksək qiymətləndirdi. Bu təkliflərdən istifadə olunacağı, müəyyən işlərin görüləcəyi deyildi. Lakin sonradan məsələ ilə bağlı bir xəbər çıxmadı. Halbuki hzırladığımız konsepsiya AFFA-nın Məşqçilər Komitəsi tərəfindən də bəyənilmişdi”.

“Bəs AFFA-dakı dəyişikliklərdən sonra yeni rəhbərliyə müraciət etmisinizmi?” sualını Oqtay Abdullayev belə cavablandırıb: “Bu yaxınlarda Veteranlar İttifaqı adından AFFA rəhbərliyinə müraəcit olundu ki, Rövşən Nəcəflə görüşək, fikirlərimizi onunla bölüşək. Təkliflərimizi verək. Çünki dediyim kimi, futbolumuzun hazırkı durumu bizi də heç cür razı sala bilməz. AFFA-nın icraçı vitse-prezidenti Sərxan Hacıyevə də bildirdik ki, Veteranlar İttifaqının sədri kimi Oqtay Abdullayev və bir sıra veteran futbolçu AFFA prezidenti ilə görüşmək istəyir. Təəssüf ki, bu günə qədər Rövşən Nəcəflə görüşdən hər hansı xəbər yoxdur. Lazımdırsa, biz Balakişi müəllimlə də görüşə, ona da öz təkliflərimizi təqdim edə bilərik. Biz də istəyirik ki, futbolun inkişafında rol oynayaq. Lakin bunun üçün veteranlara şərait yaradılmalıdır”.

Futbolxeber.az