"Sonda absurd qol buraxdıq"

"Yüksək yerlər uğrunda mübarizə aparan iki komanda oynadı. Meydanda amansız mübarizə getdi. Hər iki komanda qələbə istəyirdi. Oyun bizim üçün yaxşı alınırdı. İkinci hissədə əks-hücumlardan istifadə edib ikinci qolu vura bilərdik. Amma olmadı. Xırda səhv nəticəyə təsir edə bilərdi. Sonda qapımıza zərbə olmadan penalti təyin edildi. Əlimizdən gələni etdik. Futbolçularımın mübarizəsindən razı qaldım. Hesab 1:1 olandan sonra da hücum edən tərəf idik. Təəssüf ki, qələbə qazana bilmədik. Səfərdə bu cür rəqiblə oyunda 1 xal da pis deyil”.

Futbolxeber.az saytının məlumatına görə, bu sözləri “Zirə”nin baş məşqçisi Rəşad Sadıqov Azərbaycan Premyer Liqasının XI turunda səfərdə “Araz-Naxçıvan”la heç-heçə (1:1) oynadıqların oyundan sonra deyib.

O, daha sonra jurnalistlərin suallarını cavablandırıb:

- Fuad Bayramov oyun ərzində sizi narazı salırdı. Narazı qaldığınız hansı məqamlar idi?

- Mübarizə aparırdı. Topla oyunda itkiləri var idi. Uzun müddətdir oynamırdı. Ola bilsin ki, oyun ritmindən düşüb. Amma istəkli idi. Sadəcə topla daha yaxşı ola bilərdi.

- Penalti epizodunu necə şərh edəcəksiniz?

- Ola bilər qaydalarla penaltidir, haqlı qərardır. Mənim də xeyrimə belə penalti verilməsini istəmərəm. Ötürmə yoxdur. Futbolçu əlini yığışdırmağa çalışırdı. Qaydaları dəqiq bilmirəm.

- Üç turdur ki, qələbə qazana bilmirsiniz. Avrokuboklardan qalan yorğunluq səbəb ola bilər?

- Bu oyunları necə keçirmişik? "Turan Tovuz"un qapısı qarşısında 6 epizodumuz var idi. Bu gün qələbəyə daha yaxın tərəf biz idik. Sonda absurd qol buraxdıq. Sadəcə bu turlarda bizimlə müqayisədə rəqiblər daha uğurludur. Rəqiblərimiz cərimə meydançasından dabanla qol vurur. 90-cı dəqiqədə qol buraxırıq. Bu tip hadisələri keçən il də yaşamışıq. Təcrübəmiz var. Səbirli olmalıyıq. "Turan Tovuz"dan yaxşı oynadıq, "Sabah"la da başabaş mübarizə apardıq. Oyun baxımından problemimz yoxdur. Oyunumuzu inkişaf etdirməliyik.