AFFA-dan anlaşılmaz strategiya seçimi

Milli komandamızın UEFA Millətlər Liqasındakı ardıcıl dördüncü məğlubiyyətindən sonra Azərbaycan futbolunun problemləri yenidən gündəmi zəbt edib. AFFA rəhbərliyi son uğursuzluqlardan yayınmaq üçün müxtəlif bəhanələr gətirir. Bunlardan biri də inkişaf strategiyası ilə bağlıdır. AFFA-da rəhbər dəyişikliyindən yarım ildən çox vaxt keçsə də, hələ də ortaya konkret strategiya qoyulmayıb.

Bu günlərdə İTV-də qonaq olan assosiasiyanın baş katibi və icraçı vitse-prezidenti Sərxan Hacıyev bildirdi ki, dünya praktikasında hər hansı bir strategiya 6-8 ay ərzində hazırlanır. Görünür, Sərxan bəy bilmir ki, normalda hər hansı bir sahəni nəzarətə götürməmişdən öncə strategiya planı əvvəldən hazırlanır və işə başladıqda da yerinə yetirilməyə çalışılır. Təsəvvür edin, X şəxs millət vəkilliyinə namizəddir, seçiciləri qarşısında çıxış edərkən deyir ki, siz mənə səs verin, deputat olum, sonra biryerdə gələcək inkişafımızla bağlı strategiya hazırlayarıq. Siz bunu təsəvvür edə bilirsiniz, Sərxan bəy? Biz yox...

Odur ki, AFFA-nın indiki rəhbərliyinin inkişaf strategiyası daha əvvəldən hazır olmalı idi. Daha Sərxan Hacıyevin dediyi kimi, bunun üçün 6-8 ay vaxta ehtiyac duyulmamalı idi. Məsələnin bu tərəfini qoyuruq bir kənara. Toxunmaq istədiyimiz məqam başqadır.

AFFA-nın saytına diqqət yetirdikdə görmək olar ki, Sərxan bəyin dilindən düşməyən inkişaf strategiyası hələ 2021-ci ildə hazırlanıb. FİFA və UEFA ilə birgə hazırlanan, 2021-2025-ci illəri əhatə edən həmin strategiya ilə elə assosiasiyanın saytından tanış olmaq mümkündür.

32 səhifəlik strategiya 4 əsas istiqamətdən ibarətdir: “Kütləvi futbol və gənclərin inkişafı”, “futbol infrastrukturu”, “klub futbolu və regionlar”, “rəqəmsal ekosistem”. 

https://www.affa.az/files/21022/1051/52/2/16_0/Strategiya-2021-2025.pdf

Həmin inkişaf strategiyası qəbul olunarkən Sərxan Hacıyev AFFA-nın baş katibi, Elşad Nəsirov, Fərid Mansurov və Könül Mehdiyeva bu gün olduğu kimi İcraiyyə Komitəsinin üzvləri idi.

Zənnimiz bizi aldatmırsa, 2021-ci ildə həmin strategiyanı da hazırlayan indi AFFA-nın yeni strategiya üzərində çalışdığı Belçikanın “Double pass” şirkəti idi. Üstəlik, həmin strategiya havayı hazırlayıb. Bu, dəqiqdir. Daha doğrusu, Belçika şirkətinin xərcləri FİFA və UEFA tərəfindən qarşılanıb. Bu halda ortaya bir neçə sual çıxır:

Birincisi, faktiki olaraq 2025-ci ilə qədər nəzərdə tutulan inkişaf strategiyası varsa, yenisinə nə ehtiyac?

İkincisi, əvvəlki strategiyadan imtina olunubsa, niyə o, hələ də AFFA-nın saytında yer alır?

Üçüncüsü, əvvəlki strategiya bəyənilmirsə, yenisinə ehtiyac duyulursa, bu halda niyə əvvəlki strategiyanı hazırlayan “Double pass” şirkəti ilə yenidən əməkdaşlıq edilir?

Dördüncüsü, FİFA və UEFA-nın maliyyələşdirdiyi layihəyə AFFA niyə indi ödəniş etməlidir?..

Bu sualları çox uzatmaq olar. Amma təəssüf ki, efirdə iddia edilənin əksinə olaraq Sərxan Hacıyev yazılı media önünə çıxmır ki, suallarımızı ünvanlayaq...

Futbolxeber.az