Millimizin yarımmüdafiəçisi: “Slovakiya ilə matçdakı 5 dəqiqə həyatımın ən unudulmaz anlarıdır"

“Qırmızı vərəqəyə kimi xeyli qol epizodumuz oldu. Slovakiya kimi komanda ilə matçda bu qədər şans qazanmaq heç də asan deyil. Komandada hamımız qələbəyə köklənmişdik”.

Futbolxeber.az saytına müsahibəsində bu sözləri Slovakiya ilə görüşdə millimizin heyətində debüt edən “Araz-Naxçıvan”ın yarımmüdafiəçisi Vadim Abdullayev deyib.

O, 1:3 hesablı yenilgini belə şərh edib: “Qırmızı vərəqə hər şeyin üstündən xətt çəkdi. Rəqib usta futbolçularan qurulub. Ona görə də say üstünlüyündən maksimum yararlandılar. Təəssüf ki, yekunda mğlubiyyətlə üzləşdik. Halbuki qələbə qazanmağı çox istəyirdik. Ardıcıl məğlubiyyətlər komandada psixoloji təzyiq yaradıb. Bundan qurtulmağa çalışırdıq. Əfsuslar olsun ki, yekunda xalsız qaldıq. Halbuki uduzulası oyun deyildi”.

88-ci dəqiqədə meydana daxil olan V.Abdullayev qeyd edib ki, əslində oyuna daha tez qoşulmalı idi: “Meydana daha tez daxil olacaqdım. Mahir qırmızı almamışdan qabaq əvəzləməyə hazırlıq gedirdi. Lakin azlıqda qalmağımız planları dəyişdi. Belədə son 5 dəqiqədə meydanda mübarizə apardım. Bu 5 dəqiqə həyatımın ən unudulmaz anlarıdır. Çünki milliyə necə, hansı əziyyətlərlə gəlib çıxdığımı hamı bilir. Bu gün millinin formasını geymək mənim üçün qururdur. Ona görə bu günü heç vaxt unutmayacam. Kaş ki ilk matç qələbəmizlə yekunlaşardı”.

29 yaşlı yarımmüdafiəçi qeyd edib ki, gələcəkdə də milliyə dəvət almaq üçün əlindən gələni edəcək: “İstək, əzm, səbir, xarakter sayəsində bura gəlib çıxmışam. Dayanmaq fikrim yoxdur. Daim klubumda oynayıb milliyə çağırılmaq istəyirəm. Arzum millinin əsas heyət üzvü olmaqdır. Bu, ucuz forma deyil. Onu daşımaq üçün tər tökməlisən”.

Fərəc Aslanov