Estoniya millimizlə oyunda 2 illik həsrətə son qoydu

Dünən UEFA Millətlər Liqasının üçüncü turunda Azərbaycan millisi üzərində qələbə qazanan Estoniya yığması 2 illik həsrətə son qoyub.

Futbolxeber.az saytının məlumatına görə, buna qədər estonlar sonuncu dəfə rəsmi oyunda 2 il əvvəl qələbə qazanmışdılar. Belə ki, 2022-ci ilin 26 sentyabrında öz meydanında San Marinonu qəbul edən Estoniya millisi rəqibini 4 cavabsız qolla üstələmişdi.

Son 2 ildə dünənki matça qədər 11 rəsmi oyun keçirən Estoniya bunlardan 10-da məğlub olmuş, 1 dəfə heç-heçə etmişdi.

Bu 11 qarşılaşmadan ikisi Azərbaycan millisi ilə oyunlara təsadüf edib. Avro-2024-ün seçmə mərhələsi çərçivəsində Estoniya millisi Bakıda 1:1-lik heç-heçəyə nail olmuşdu və bu, komandanın 2 il ərzində uduzmadığı yeganə rəsmi matç idi. Lakin dünənki görüşdən fərqli olaraq, ötən ilin 13 oktyabrında Azərbaycan millisi səfərdə Estoniyanı 2 cavabsız qolla üstələmişdi. Canni de Byazinin rəhbərlik etdiyi millizin heyətində həmin matçda Toral Bayramov və Ramil Şeydayev fərqlənmişdi. Ramildən fərqli olaraq Toral dünən də estonların qapısına yol tapsa da, bu, millimizi məğlubiyyətdən xilas etmədi. Beləcə, estonlar 2 illik qələbə həsrətinə Azərbaycan millisi ilə oyunda son qoydular.