Vətənindən vətəninə gələn Mert Çelik: “Yenidən Azərbaycan millisində oynamaq istəyirəm”

“Səbail”in müdafiəçisi Mert Çelikin Futbolxeber.az saytına müsahibəsi

- Azərbaycan Premyer Liqasının üçüncü turunda “Sumqayıt”a 1:2 hesabı ilə məğlub oldunuz. Yenilgini necə şərh edərdiniz?

- Çox məyusuq. Meydana qələbə qazanmaq üçün çıxmışdıq. Matçın sonlarında qapımızda qol gördük. Artıq məğlubiyyətdən qaçmaq üçün vaxt da qalmamışdı. Təəssüf ki, ən azı 1 xala layiq olduğumuz oyunda uduzduq. Artıq növbəti matç barədə düşünməli və mütləq qələbə həsrətinə son qoymalıyıq.

- Sözlərinizdən belə çıxır ki, “Səbail” məğlubiyyətə layiq deyildi?

- Əsla layiq deyildik. 3 xal qazanmağı hədəfləyirdik. Qalib gələ bilərdik. Bir qədər də ağıllı oynasaydıq, baş məşqçinin tapşırıqlarını daha yaxşı yerinə yetirsəydik, qələbə qazanardıq.

- İlk 2 turda “Səbail” birinci hissədə zəif təsir bağışlasa da, fasilədən sonra daha yaxşı çıxış etmişdi. Lakin “Sumqayıt”la matçda əksinə oldu. Bunu nə ilə əlaqələndirirsiniz?

- Biz əlimizdən gələni etməyə çalışırıq. Şansları daha yaxşı dəyərləndirməli, müdafiədə daha diqqətli olmalıyıq. Səhvlərə yol verməməliyik. Çalışmalıyıq ki, 90 dəqiqə ərzində daha yaxşı oynayaq.

- Müəyyən fasilədən sonra Azərbaycana qayıtdınız. Çempionatın səviyyəsində hansı dəyişiklik var?

- Azərbaycan Premyer Liqası daha səviyyəli olub. Daha yaxşı legionerlər gəlib. İndi çempionatda mübarizə aparmaq həqiqətən də çox çətindir. Heç bir rəqibə mütləq 3 xal gözü ilə baxmaq mümkün deyil. Halbuki əvvəl belə deyildi.

- “Səbail”dəki hədəfləriniz nədir?

- Yenidən Azərbaycan millisində oynamaq istəyirəm. Bunun üçün əlimdən gələni edəcəm.

- Vətənindən vətəninə gələn Mert Çelik Azərbaycanda özünü necə hiss edir?

- Özümü heç burdan ayrılmamış kimi hiss edirəm. Sanki həmişə burda olmuşam. Hər kəs məni çox yaxşı qarşıladı. Buna görə çox şadam. Azərbaycanda olduğum üçün məmnunam və ümid edirəm ki, uzun illər burada qalacağam.

- Növbəti turda “Kəpəz”lə qarşılaşacaqsınız. Sizin kimi, rəqib də qələbəyə acdır. Bu məqam “Səbail”in işini çətinləşdirməyəcək?

- Rəqibin durumu ilə maraqlanmırıq. Bizim hədəfimiz qarşıdakı matçda 3 xal qazanmaqdır. Bunun üçün əlimizdən gələni edəcəyik. Çalışacağıq ki, qələbə qazanmaqla əvvəlki matçlardakı uğursuzluqları unutduraq.

Fərəc Aslanov