Samir Abasov: “Səbail” bir çox komandadan xal alacaq”

“Şahin Diniyev ilk turda “Zirə” ilə matçdan sonra demişdi ki, komandam 3-cü turda yaxşı oyun göstərəcək. Doğrudan da elə oldu. Şahin Diniyev təcrübəli məşqçidir. Onlar ötən turda "Neftçi"yə qarşı yaxşı mübarizə aparmışdı. "Səbail" biz də daxil olmaqla bir çox komandadan xal alacaq”.

Futbolxeber.az saytının məlumatına görə, bu sözləri “Sumqayıt”ın baş məşqçisi Samir Abasov Azərbaycan Premyer Liqasının üçüncü turunda “Səbail”i 2:1 hesabı ilə məğlub etdikləri oyundan sonra deyib.

O, qələbə münasibəti ilə futbolçularını təbrik edib: “Gərgin mübarizə getdi. Rəqib istədiklərimizi etməyə imkan vermirdi. Futbolçularımı təbrik edirəm. Sona qədər inandılar. Bərabərlik qolunu buraxdıqdan sonra reaksiya verə bildik. Belə çətin qələbələr xeyrimizə olacaq”.

S.Abasov Şahin Diniyevin “oyunun  ədalətli nəticəsi heç-heçə idi” fikri ilə razılaşıb: “Fikirləşirəm ki, bugünkü matçın ədalətli nəticəsi elə heç-heçə idi. Futbolda belə şeylər olur”.

Mütəxəssis oyun planındakı çatışmazlıqları açıqlayıb: “Futbolçularımız həddindən artıq top itkilərinə yol verirdi. Düşündüyümüz boşluqlardan istifadə edə bilmədik”.

Abasov yeni transferlərin bir qədər vaxta ehtiyac duyduqlarını vurğulayıb: “Uzun müddətdir futbolsuz idilər. Gündə iki dəfə fərdi məşq edirlər. Nə vaxta hazır olacaqlarını demək çətindir”.