“Kurban Berdıyev əlindən gələni edir ki, inkişaf edək, daha da irəli gedək”

“Turan Tovuz”un yarımmüdafiəçisi Tural Bayramlının Futbolxeber.az saytına müsahibəsi

- Azərbaycan Premyer Liqasının ikinci turunda “Sumqayıt” üzərində 1:0 hesablı qələbə qazandınız. Qazanılan 3 xalı necə şərh edərdiniz?

- “Sumqayıt yaxşı komandadır. Baxımlı futbol oynayırlar. Ona görə də görüş çox çətin alındı. Cari mövsümdə ilk ev oyunumuz idi. Stadiona toplaşan azarkeşləri sevindirmək istəyirdik. Buna üçün əlimizdən gələni etdik. Çox şükür ki, qarşıya qoyulan məqsədə çatdıq və meydanı 3 xalla tərk etdik.

- Matçın əvvəlində çox güclü pressinq tətbiq edirdiniz. Fiziki baxımdan çətin deyildi?

- Xeyr. Fiziki cəhətdən durumumuz yaxşıdır. İlk dəqiqələrdən pressinq tətbiq etmək baş məşqçimizin tapşırığı idi. Biz də onun tapşırığını yerinə yetirməyə çalışırdıq.

- Qələbə qolunun məhsuldar ötürməsini verdiniz. Bu məqamı nəzərə alaraq oyununuzdan razı qaldığınızı söyləmək mümkündür?

-  Komandamın uğuru üçün əlimdən gələni edirəm. Baş məşqçinin verdiyi şansdan yararlanmaq istəyirəm. Hər bir futbolçu kimi mən də komandamın qələbəsində pay sahibi olmaq arzusundayam. Şadam ki, “Sumqayıt”la görüşdə məhsuldar ötürmə müəllifi oldum.

- Hər iki matçda start heyətində yer almısınız. Demək olar ki, Tural Bayramlı artıq yeni komandasına tam uyğunlaşıb?

- Uyğunlaşma baxımından hər hansı bir çətinlik yoxdur. Özümü “Turan Tovuz”da çox yaxşı hiss edirəm. İnanıram ki, tezliklə daha yaxşı formada olacam və komandamın uğurlarında yenə də pay sahibi olacam.

- “Sumqayıt”la matçda həm də “Turan Tovuz”un futbolçusu kimi ilk dəfə yerli publika önünə çıxdınız. Tovuzlu azarkeşlər barədə fikirləriniz necədir?

- Stadionda atmosfer əla idi. Azarkeşlər 90 dəqiqə ərzində bizə inanılmaz dəstək verdilər. Biz də oyunumuzla o möhtəşəm dəstəyin qarşılığını verməyə çalışdıq. Azarkeşləri qələbə ilə sevindirdiyimiz üçün çox şadam.  

- Qarşıdan Qərb derbisi gəlir. “Kəpəz”lə matçdan gözləntiləriniz nədir?

- “Kəpəz” yaxşı komandadır. Baxmayaraq ki, ilk 2 turda xal qazana bilməyiblər. Ümumiyyətlə, hər bir komandaya hörmətlə yanaşırıq. Çünki liqada zəif rəqib yoxdur. Heç bir oyun asan keçmir. “Kəpəz”lə matça çox ciddi hazırlaşırıq. Əlimizdən gələni edəcəyik ki, yaxşı futbol oynayaraq qələbə qazanaq və azarkeşlərimizi yenidən 3 xalla sevindirək.

- Baş məşqçi Kurban Berdıyev barədə nə deyə bilərsiniz? Təcrübəli mütəxəssislə çalışmaq çətin deyil?

- Berdıyev çox yaxşı məşqçidir. Hamıya eyni cür yanaşır. Əlindən gələni edir ki, biz inkişaf edək, daha da yaxşı vəziyyətə gələk. Bu cür mütəxəssislə çalışmaq çox xoşdur. Onun rəhbərliyi altında daha yaxşı vəziyyətə gələcəyimizə əminəm.

Fərəc Aslanov