Risto Ristoviç: "Karyeram ərzində bundan da uzaq məsafələrdən qol vurmuşam" (Müsahibə)

"Bakı"nın futbolçusu Risto Ristoviç Futbolxeber.az saytına müsahibə verib.

- İlk növbədə bu gün "Xəzər Lənkəran"ı 3:0 hesabı ilə məğlub etdiyiniz oyun haqda fikirlərini öyrənmək istərdik.

- Oyun çox yaxşı alındı. Komandamız əla futbol sərgilədi və layiqli qələbə qazandı. Qarşılaşma həm komandam, həm də mənim üçün uğurlu alındı. Bundan sonra qarşıdakı oyunlarda da qələbə qazanmaq üçün əlimizdən gələni etməliyik.

- Səncə, bu gün "Bakı" yaxşı oynadı, yoxsa "Xəzər Lənkəran" zəif çıxış etdi?

- Yox, "Bakı" yaxşı oynadı. Hətta bugünkü çıxışımıza əla da demək olar. Kompakt şəkildə mübarizə apardıq. Amma "Xəzər Lənkəran" da yaxşı komandadır.

- Son oyunlarda "Bakı" qələbə qazana bilməsə də, bu gün meydanda tam fərqli komanda gördük. Demək olar ki, "Bakı" "Xəzər Lənkəran"la oyuna xüsusi şəkildə hazırlaşmışdı?

- Əvvəla onu deyim ki, biz son oyunlarda da yaxşı oynamışdıq. Sadəcə olaraq, bəxt bizdən üz döndərmişdi. Xal itirdiyimiz oyunlarda da üstün oynamağımıza, xeyli qol epizodu yaxalağımıza baxmayaraq, qələbə qazana bilmirdik. Bu gün isə hər şey istədiyimiz kimi alındı.

- Özün də cərimə zərbəsindən gözəl qola imza atdın...

- Təbii ki, fərqləndiyim üçün çox şadam. Gələcəkdə də fərqlənib, komandamın qələbəsində pay sahibi olmaq istəyirəm.

- Məsafə uzaq olsa da, birbaşa zərbə endirdin. Zərbədən öncə fərqlənəcəyinə inanırdın?

- Əlbəttə. Çünki karyeram ərzində bundan da uzaq məsafələrdən qol vurmuşam.

- "Xəzər Lənkəran"ın baş məşqçisi Con Toşakın "Bakı" ilə oyundan sonra istefa verdiyindən xəbərin var?

- Yox, bu haqda məlumatsızam. Toşakın bizimlə oyundan sonra postundan getdiyini ilk dəfə sizdən eşidirəm.