“Sabah”ın qapıçısı: “Bir gün əvvəl uşaqlara demişdim ki, oyunda penalti çıxardacam”

“Sabah”ın qapıçısı Yusif İmanov UEFA Konfrans Liqasının ikinci təsnifat mərhələsində Tel-Əviv “Makkabi”sini penaltilər seriyasında məğlub etdikləri oyundan sonra jurnalistlərin suallarını cavablandırıb. Futbolxeber.az saytı 22 yaşlı qapıçının müsahibəsini təqdim edir:

- 120 dəqiqəlik dramatik oyun və penaltilər seriyası. Gərgin qarşılaşmanı necə şərh edərdin?

- Oyun çox çətin keçdi. Dəhşətli dərəcədə temp var idi. Azarkeşlərə təşəkkür edirəm ki, bizi tək qoymadılar, 120 dəqiqə dəstək oldular. Çox sağ olsunlar.

- Qapında 6 qol görsən də, kritik qurtarışların da oldu. Öz çıxışını necə dəyərləndirirsən?

- Əlimdən gələni etdim. Çalışdım ki, komandama köməm edim. Bəzi epizodları çıxarda bilərdim. Qismət olmadı.

- Penalti seriyasında həyəcan var idi?

- Xeyr, özümə inanırdım. Hətta bir gün əvvəl uşaqlara demişdim ki, oyunda penalti çıxardacam. Çox şükür ki, oyunsonrası penaltilər seriyasında bunu bacardım.

- Maraqlıdır ki, rəqibin bütün penaltiləri zamanı eyni istiqamətə - özündən sola tullanırdın...

- Bəli. Stratetigaya seçmişdim ki, bütün zərbələrdə ancaq eyni tərəfə tullanacam.

- Matçın gedişində tez-tez komanda yoldaşlarına narazılıq edirdin, qışqırırdın. Bu, nədən irəli gəlirdi?

- Biz oyundan öncə danışmışdıq ki, arxaya oturmaq olmaz. Rəqibi öndə qarşılaşamalıyıq. Lakin “Makkabi” çox aqressiv başladı oyuna. Komanda məcburən geri çəkilmişdi. Mən də komanda yoldaşlarımı motivasiya etmək üçün tez-tez qışqırırdım.

- İkinci hissədə “Makkabi” ardıcıl qollar vuranda ümidsizliyə qapılmamamışdınız?

- Açığı, bir az ümidsizlik oldu. Lakin çox şükür ki, tez ayıldıq.

- Növbəti rəqib “Sent-Patriks”dir. İrlandiyalılarla qarşılaşmalardan gözləntin nədir?

- Əlimizdən gələni edəcəyik ki, bu mərhələni də keçək. Növbəti tura yüksəlmək üçün hər iki matçda bütün gücümüzü meydanda qoyacağıq.

- “Makkabi” ilə duellərdən fərqli olaraq, bu dəfə cütün favoriti “Sabah” sayılır.

- Belə düşünmürəm. Ümumiyyətlə, favorit yalnız kağız üzərində olur. Gördüyünüz kimi, püşkdən öncə “Makkabi” favorit hesab edilirdi. Lakin mərhələni adlayan tərəf biz olduq.

- Artıq Azərbaycan Premyer Liqasında yeni mövsüm start götürür. Sıx qrafik sizə problem yaratmayacaq?

- Düşünmürəm ki, hər hansı problem yaşayaq. Əksinə, oyunlara daha yaxşı motivasiya olacağıq.

Fərəc Aslanov