Rəşad Sadıqov: "Belə rəqiblər həmişə təhlükəlidir"

"İlk oyundan sonra danışmaq həmişə çətindir. Xüsusilə də, bu oyundan sonra. Qarşıda bizi çox vacib səfər matçı gözləyir".

 

Futbolxeber.az saytının məlumatına görə, bu sözləri "Zirə"nin baş məşqçisi Rəşad Sadıqov Konfrans Liqası 2-ci təsnifat mərhələsinin ilk oyunu çərçivəsində Bakıda "DAK 1904"ü 4:0 hesabı ilə məğlub etdikləri oyundan sonra mətbuat konfransında deyib.

 

O, böyükhesablı qələbəni belə şərh edib: "Mərhələni keçmək istəyiriksə, bu gündən həmin oyuna hazırlaşmalıyıq. Birinci hissə bitdi. Bir həftəlik fasilə olacaq. İkinci hissəyə çox yaxşı hazırlaşmalıyıq. Qarşıda bizi daim komandasını yaxşı dəstəkləyən azarkeş toplumuna qarşı səfər oyunu gözləyir. Rəqib sona qədər amansız mübarizə aparacaq. Belə rəqiblər həmişə təhlükəlidir. Hesab 4:0 olsa da, təslim olmurlar. Mərhələni keçmək istəyiriksə, futbol camiəsi, komanda olaraq oyuna hazırlaşmalıyıq. Cütün taleyi səfərdə həll olunacaq. Müasir futbolda nəticə üstünlük verir sənə... Amma rahatlıq verə bilməz. 60-cı dəqiqədən sonra rəqibin göstərdiyi amansız mübarizə və çətin anlar onu göstərdi ki, bizi cavab matçında nələr gözləyir".

 

R. Sadıqov Pyer Zeblini əvəzləyəndə futbolçusunun narazılıq bildirməsi haqda da danışıb: "Ayağını tutmuşdu. 2-3 dəqiqə gözlədi. Dedi ki, yaxşıyam. Amma tempi aşağı düşdü. Rəqib də o dəqiqələrdə təzyiq edirdi. Əvəzlənəndə dedi ki, özümü yaxşı hiss edirdim. Dedim ki, sonra danışarıq, buranın söhbəti deyil".

 

Mütəxəssis rəqibin sona qədər oyundan qopmadığını bildirib: "4:0-dan sonra rəqibin dayanacağını, oyun intizamının pozulacağını gözləyirdim. Amma 60-cı dəqiədən sonra meydanda baş verənlər məni çox narahat edirdi".