Georgi Kantariya: “Mənə inandığı üçün Ayxan Abbasova minnətdaram”

“Şamaxı”nın yeni transferlərindən olan Georgi Kantariyanın Futbolxeber.az saytına müsahibəsi

- “Şamaxı”ya transferiniz necə alındı?

- “Şamaxı” ilə artıq müqavilə imzalamışıq. İyulun 7-də Bakıya gələcəm. Tibbi müayinədən keçdikdən sonra Şamaxıya yollanacam və komanda ilə birgə yeni mövsümün hazırlıqlarında iştirak edəcəm.

- “Şamaxı”nın baş məşqçisi Ayxan Abbasovu tanıyırsınız. Onun bir məşqçi kimi necə xarakterizə edərdiniz?

- Bəli, bir-birimizi çox yaxşı tanıyırıq. Mənə inandığı və təklif göndərdiyi üçün Ayxan Abbasova minnətdaram. Onun Tovuzda yaxşı komandası var idi. Orada oynamaq bütün komandalar üçün çətin idi. Ayxan Abbasov həm yaxşı məşqçi, həm də yaxşı insandır.

- “Şamaxı”nın qarşısına hansı hədəflər qoyulub?

- Bu mövsüm komandanın qarşısına qoyulan hədəf Premyer Liqada yerini qorumaq, möhkəmlənməkdir. Bacardığımız qədər daha yuxarı pillələrdə qərarlaşmaq üçün əlimizdən gələni edəcəyik.

- Bir illik fasilədən sonra yenidən Azərbaycan Premyer Liqasında çıxış edəcəksiniz. Bu bir il ərzində çempionatın oyunlarını izləyirdiniz? Kənardan səviyyə baxımından əvvəlki illərə baxanda fərq hiss olunurdu?

- Əlbəttə, Azərbaycan çempionatını izləyirdim. Son mövsüm çox maraqlı və gərgin alındı. Əksər komandalar özlərini yaxşı tərəfdən göstərdilər. 4-5 kollektiv sona kimi avrokuboklar uğrunda mübarizə apardı. Təəssüf ki, “Qəbələ” kimi infrastrukturu olan komanda Premyer Liqa ilə vidalaşdı. Ümid edirəm ki, onlar növbəti mövsüm yenidən yüksək liqaya qayıdacaqlar. Eləcə də sabiq komandam “Kəpəz”i təbrik etmək istərdim. Komanda bütün çətinliklərə baxmayaraq, Premyer Liqadakı yerini qoruya bildi.

- Hazırda Gürcüstan millisi Avropa çempionatında çıxış edir. Hansı hisslər keçirirsiniz?

- Bütün Gürcüstan hazırda milliyə azarkeşlik edir. Onlar tarix yazaraq Avropa çempionatına vəsiqə qazandılar. Hər birimiz bununla fəxr edirik. Futbolçularımıza bizə yaşatdıqları emosiyaya görə minnətdarıq.

- Bizim futbola yaxından bələdsiniz. Azərbaycan futbolunda nələri dəyişmək lazımdır ki, yaxın gələcəkdə biz də o hissələri yaşayaq?

- Struktura dərinliyindən bələd olmadığım üçün Azərbaycan millisi haqda dəqiq fikir bildirə bilmərəm. Gürcüstanla bağlı onu deyim ki, millimizin bu uğurunda uşaq akademiyalarının böyük rolu oldu. 10 il əvvəl federasiya Avropa standartlarına cavab verən akademiyalar yaratdı. Məhz bu məqam gənclərin inkişafına yol açdı. Baxın, bu gün gürcü gənclər Avropanın müxtəlif ölkələrində, klublarında çıxış edirlər. Hesab edirəm ki, məhz bu məqam bizim Avropa çempionatına yüksəlməyimizdə böyük rol oynadı.

İbrahim CƏFƏROV