“Qarabağ”ın baş məşqçisindən çempionluq şərhi: “Finala yaraşan oyun idi”

“Neftçi” ilə oyunlarımız həmişə gərgin mübarizə şəraitində keçir. Budəfəki final matçımız da istisna olmadı”.

Futbolxeber.az saytına açıqlamasında bu sözləri U-13 Liqasının finalında “Neftçi”ni 1:0 hesabı ilə məğlub etməklə ölkə çempionu olan “Qarabağ”ın baş məşqçisi Elşad Xudadatov deyib.

Mütəxəssis hər iki komandanın finalda layiqli oyun sərgilədiyini qeyd edib: “Atmosfer tam başqa idi. Hər iki komanda gözəl, mübariz oyun sərgilədi. Komandamızı təbrik edirəm. “Neftçi”ni də gözəl oyuna təbrik etmək istərdim. Bütün bunlar Azərbaycan futbolunun gələcəyi üçündür. Bu gün “Neftçi”də oynayan sabah “Qarabağ”da oynaya bilər, yaxud da əksinə, bu gün “Qarabağ”ın formasını geyə bilən sabah “Neftçi”nin formasını geyə bilər. Hamısı bizim balalarımızdır”.

E.Xudadatov azarkeşlərə də minnətdarlığını çatdırıb: “Final mənə çox xoş təsir bağışladı. Finala yaraşan oyun idi. Hər iki komandanı azarkeşlər də dəstəkləyirdi. Onlara da minnətdaram ki, sona qədər uşaqlara dəstək oldular”.

Fərəc ASLANOV