Qurban Qurbanov: “Mənim "Qarabağ"la hələ 1 illik müqaviləm var"

"Futbolçularımı təbrik edirəm. Rəqib yaxşı performans göstərdi. Azarkeşlərə təşəkkür edirəm ki, soyuqda matçı izlədilər".

 

Futbolxeber.az saytının məlumatına görə, bu sözləri "Qarabağ"ın baş məşqçisi Qurban Qurbanov Azərnbaycan Premyer Liqasının 35-ci turunda "Turan Tovuz"u 4:3 hesabı ilə məğlub etdikləri oyundan sonra təşkil olunan mətbuat konfransında deyib. 

 

Daha sonra o, jurnalistlərin suallarını cavablandırıb.  

 

- Bizim baş məşqçilər xarici səfərlərə gedir. Bu gün Azərbaycanda bir nömrəli məşqçi sizsiniz. Maraqlıdır, kimlərsə xaricdən sizin yanınızda təcrübə keçmək istəyən olub?

 

- Xaricdən gələnlər olub. Rusiya, Qazaxıstan, Polşa və s. Klub olaraq buna sevindik. Biz də gedirik xaricdən öyrənirik. Bizimlə də belə görüşlər keçirəndə şad oluruq. Kim nə vaxt gəlmək istəsə, qapımız onlara açıqdır. Amma özüm də axtarışdayam. Kənardan başqaları fikir bildirsə, daha yaxşı olar.

 

- AFFA İK-nın iclasından sonra infrastruktur problemindən söz açmışdınız. İnfrasturukturu formalaşdırmaq üçün nə qədər müddət lazımdır?

 

- Vaxt demək düzgün çıxmaz. Amma klublarımız böyüsə, stabil sponsorlar olsa, çox vaxt lazım deyil. Bizim bazamızın hazır vəziyyətə gəlməsinə maksimum 2 il müddət getdi. Yaxşı istək olsa və başa düşərək işə yanaşsan, vaxt çox getməz. Futbolun inkişafı üçün birinci amil infrasturuktur olmalıdır.

 

- Mayın 5-də klubun sosial mediasında “Tezliklə” başlıqlı paylaşım olmuşdu. Həmin paylaşımla bağlı azarkeşlər arasında qızğın müzakirə getmişdi. Kimisi Kadi qayıdır deyirdi, bir başqası Mahir Emreli. Qurban Qurbanovla yeni müqavilə imzalanacağı iddiası da mövcud idi. Maraqlıdır, sizin "Qarabağ"la müqaviləniz bitib?

 

- Kim paylaşıb onu? (gülür) Vallah, heç birindən məlumatım yoxdur. Hələ komanda ilə 1 illik müqaviləm var. Digər xəbərlərlə bağlı isə məlumatım yoxdur.

 

- Portuqaliya mətbuatı Andredeyə təklif olduğunu yazmışdı.

 

- Belə məlumat yoxdur.

 

- Sərəncamınızdakı legionerlərin daha yüksək liqaya getmək istəyənlər var?

 

- Qərar vermək asandır. Çox hissəsinin müqaviləsi var. Hansı oyunçu klubdan getmək istəsə, mütləq qarşılıqlı razılıq olmalıdır. Bu mənim üçün asan olan tərəfdir. Hazırda hər hansı futbolçu ilə danışıq olmayıb. Hamı bu komandaya hörmətlə yanaşır. Ola bilər kimlərləsə, danışıq olsun. Çalışacağıq ki, klub üçün faydalı olsun.

 

- Son iki turda əsas oyunlarda VAR hakimləri əcnəbi olacaq. Buna ehtiyac var idi?

 

- Bunu heç xoş qarşılamadım. Hamı öz sahəsində aktiv olmağa çalışmalıdır. Bu gün şansımız varsa ki, daha yaxşı olmalıyıq. Səhvlər olur, bilmirəm VAR nə qədər qəlizdir. Amma əgər bir insanın, hakimin işi qərar verməkdirsə və bundan narazılıq olacaqsa, hakim bu qərarı verməsə yaxşı olar. Referilərimiz yəqin ki, bundan sonra daha məsuliyyətli çalışarlar. Cavan kadrlardır. Əslində bu təcrübə digər ölkələrdə də var. Əliyar Ağayev Yunanıstana gedir. Bu yaxşıdır. Demək güvənirlər. Yerli hakimlərimiz yəqin ki, gələcək mövsüm üçün kiməsə şans verməzlər. Baxmayaraq ki, hər sahədə legioner olur, amma hakimlikdə yerli olmalıdır.

 

- Bu işdə hakimlər günahkardılar?

 

- Bəli, daha çox aktiv olamldırlar.

 

- “Bayer”ə həm Avroliqada, həm də Bundesliqada çempionluq arzu etmişdiniz...

 

- Hər arzum belə həyata keçsəydi (gülür)… Hər oyundan əvvəl rəqibə uğur arzulayırıq. Bu gün də rəqiblərimizə uğurlar arzuladıq. Belə hallar olur. Amma onlar sanki çempionluğa layiqirlər. Öz işləri ilə məşğul olurlar. Hamısı istəkli, sadə, bacarıqlı və işgüzardır. Elə komandalar var ki, onlara qalibiyyət yaraşır. Finalda da onlara azarkeşlik edəcəyəm

 

- Danışıq apardığınız futbolçular var?

 

- Demək olar ki, hər mövqedə olan oyunçulara baxış keçiririk. Bəzən elə oyunçu olur ki, ona yox deyə bilmirsən. Müdafiə, yarımmüdafiə və hücum xəttinə axtarış gedir. Hər zaman olduğu kimi indi də çətindir. Əsas kollektivi qoruyub saxlamaqdır. Bundan sonra bir neçə oyunçu heyətimizə qatmaq istərdik.