Tiaqo Silva: “Qələbə haqqımızdır”

“Zirə”nin qapıçısı Tiaqo Silvanın Futbolxeber.az saytına müsahibəsi

- Azərbaycan Premyer Liqasının 31-ci turunda “Neftçi” üzərində 3:1 hesablı qələbə qazandınız. Görüş barədə nə deyə bilərsiniz?

- Düşünürəm ki, oyuna elə də yaxşı başlamadıq. Penalti epizoduna qədər matça nəzarəti əlimizdə saxlaya bilmirdik. Bundan sonra üstünlüyü qismən də olsa ələ aldıq. Bir neçə hücum quraraq hissənin sonlarına yaxın bərabərlik qoluna imza atdıq. Bu qoldan sonra da bir neçə cəhdimiz oldu. İkinci hissədə bir növ döyüşçüyə çevrilmişdik. "Neftçi"yə qarşı layiqli mübarizə apardıq. Qələbə haqqımızdır.

- Meydanda azlıqda qaldıqdan sonra 2 qol vurub qələbə qazanmağınız sizin üçün gözlənilməz oldu?

- Azlıqda qaldıqdan sonra əsas hədəf komanda olaraq kompakt şəkildə müdafiə olunmaq idi. "Neftçi"nin də bundan sonra irəliyə atılacağı gözlənilirdi. Onlar davamlı təhlükəli vəziyyətlər yaratdıqca, bizim də əks-hücumlar qurmaq şansımız artırdı. Düşünürəm ki, bu əks-hücumlardan vaxtında istifadə edib 2 qol vurduq. Oyunun gedişatını nəzərə alsaq, qələbəyə layiq olduğumuzu deyə bilərəm.

- Bəzən “Zirə”ni müdafiə futbolu oynamaqda ittiham edirlər...

- İnsanlar bizim qədər meydanda nə baş verdiyini dərk edə bilmir. Təbii ki, hər kəsin öz fikri var və biz bunlara hörmətlə yanaşırıq. "Zirə"nin 3:0 və ya 1:0 qələbə qazanmağının önəmi yoxdur. Vacib olan 3 xal qazanmaqdır. "Neftçi" kimi bir rəqiblə oyunda buna nail olmaq təqdirəlayiqdir.

- Bu qələbədən sonra “Zirə”nin avrokubok şansını xeyli artırdığını söyləmək olar?

- “Neftçi” üzərində qələbə avrokuboklara gedən yolda böyük motivasiya olacaq. Unutmayaq ki, növbəti həftə Azərbaycan kubokunun cavab matçına çıxacağıq. Buna köklənməliyik.

- Həmin matçdan gözləntiləriniz nədir?

- Səfərdə “Qəbələ”yə qarşı oynamaq çətindir. Üstəlik, rəqib çempionatda istədiyi nəticələri qazana bilmədiyindən bütün ümidini kuboka bağlayıb. Lakin istənilən halda biz səfərə uğurlu nəticə qazanmaq üçün gedəcəyik. Məqsədimiz kubokda final oynamaqdır.

- Kubokdan sonra növbəti turda "Araz-Naxçıvan"la qarşılaşacaqsınız. Komandada yorğunluq olmayacaq?

- Açıq deyim ki, hazırkı vəziyyətdə bu matç haqqında düşünmək vaxtı deyil. Azərbaycan kubokunda "Qəbələ"yə qarşı cavab görüşünə köklənmişik. Oyundan oyuna fokuslanmaq daha məqsədəuyğundur.

Azad NURİYEV