Andre Şinyaşiki: “Yaxşı oynamalıyıq ki, hakim qərarına möhtac qalmayaq”

“Neftçi”nin hücumçusu Andre Şinyaşikinin Futbolxeber.az saytına müsahibəsi

- “Sumqayıt”la oyun turnir cədvəli baxımından çox mühüm əhəmiyyət kəsb etsə də, “Neftçi” qələbə qazana bilmədi. 1:1-lik heç-heçəni necə şərh edərdiniz?

- Matç bizim istədiyimiz kimi alınmadı. Qalib gəlməli olduğumuz oyundan bu nəticə ilə ayrılmağımız sevindirici deyil. Çünki doğma meydanda qələbəyə ehtiyacımız var idi.

- Oyundan sonra ən çox müzakirə olunan mövzu hakimlikdir. Siz barədə hansı fikirdəsiniz?

- Əksər hallarda hakimlər haqqında danışmağı xoşlamıram. Əvvəllər də belə hallar olub. Amma bu oyundakı hakimlik "inanılmaz" idi. Mən hələ də, qol vurduğum epizodda qayda pozuntusunun səbəbini, bunun harda baş verdiyini, və hakimin bu qənaətə necə gəldiyini müəyyən edə bilmənişəm. Bu hakim oyuna daha diqqətlə yanaşmalıdır, belə epizodlarda olduqca dəqiq və ədalətli qərar verməlidir. Bu, bizim həyatımıza, performansımıza birbaşa təsir göstərir.

- Yəni “Sumqayıt”la matçda xal itkisini hakimliklə əlaqələndirirsiniz?

- Xeyr, hakimin təsiri olsa da, bizim sərgilədiyimiz oyunda da problemlər var. Yenə də deyirəm, hakim qərarı matçın nəticəsində xüsusi rol oynadı. Amma biz də yaxşı oynamalıyıq ki, hakim qərarına möhtac qalmayaq. Üslubumuzu daha da yaxşılaşdırılmalıyıq. Bununla belə, hakimlər də matçları daha yaxşı idarə etməlidirlər.

- “Sumqayıt”la heç-heçədən sonra turnir cədvəlində üçüncü pilləyə endiniz...

- İkinci pillədə qalmaq bizim üçün son dərəcə əhəmiyyətlidir. Bu gün xal itirdiyimiz üçün bu yeri əldən verdik, buna görə çox məyusuq. Mövsümün sonunda ikinci pillədə olmaq əsas hədəfimizdir. Üçüncü pillə də pis deyil, amma ikinci yerdə olmaq məqsədimizdir.

- Növbəti turda "Araz-Naxçıvan"la qarşılaşacaqsınız. Həmin qarşılaşmadan gözləntiləriniz nədir?

- Düzünü desəm, rəqibin kimliyinə görə yox, qələbəyə görə meydana çıxırıq. Bizə fərq etmir, hədəf yalnız qalibiyyətdir. Meydanın hər bir mövqeyində qələbə qazanmaq üçün mübarizə aparırıq. "Neftçi" olaraq həmin matçda mütləq qələbə qazanmalıyıq.

Azad NURİYEV