Tiaqo Silva: “Qəbələyə müdafiə olunmağa getməyəcəyik”

“Yüksək səviyyəli, gərgin oyunun şahidi olduq. Bu növ dinamik matçlar Azərbaycan futbolu adına təqdirəlayiqdir. Nə yaxşı ki qələbə qazandıq. Səfərə az da olsa, üstünlüklə yollanacağıq”.

Futbolxeber.az saytına müsahibəsində bu sözləri “Qəbələ”ni 2:1 hesabı ilə məğlub etdikləri Azərbaycan kubokunun yarımfinal mərhələsinin ilk oyunu çərçivəsində danışarkən “Zirə”nin qapıçısı Tiaqo Silva deyib.

Braziliyalı qolkiper səfərdə keçiriləcək cavab matçına da qələbə üçün yollanacaqlarını vurğulayıb: “Sonda buraxdığımız qol cavab oyunu ilə bağlı planlarımıza təsir etməyəcək. Qəbələyə müdafiə olunmağa getməyəcəyik. Səfər matçında hesabı qorumaq yox, qələbə barədə düşünürük. Çalışacağıq ki, meydanda diktə edən tərəf biz olaq”.

“Zirə”nin “1 nömrə”si qısa zaman kəsiyində “Qəbələ” ilə ardıcıl 3 oyun keçirmələrinə belə münasibət bildirib: “Düşünmürəm ki, bu, bezdirici olsun. Hər oyuna qələbə üçün çıxırıq. Bu, kubok matçı idi. Həftəsonu isə çempionat matçında üz-üzə gələcəyik. “Qəbələ”nin keyfiyyətinə bələdik. Bununla belə, yenə də qalib gəlməyə çalışacağıq”.

T.Silva “Zirə” üçün kubokdan, yoxsa çempionatdan avrokuboklara yollanmaq real görünür?” sualını belə cavablandırıb: “Elə bir fərqi yoxdur. İstər çempionat, istərsə də kubok olsun. hər iki turnirdən avrokuboklara vəsiqə qazana bilərik. Ümumi götürdükdə isə çox istərdik ki, kubokda finala kimi irəliləyək və çempionatı ikinci yerdə başa vuraq”.

Fərəc ASLANOV