Ağabala Ramazanov qayıtdı - FOTO

Azərbaycan Premyer Liqasının XII turunda, ötən il noyabrın 3-də “Turan Tovuz”la keçirilən oyunda huşunu itirən “Səbail”in kapitanı Ağabala Ramazanov yaşıl meydanlara qayıdıb.

Futbolxeber.az saytının məlumatına görə, 30 yaşlı hücumçunun yaşıl meydandalı məşqdən fotosu klubun feysuk hesabında yer alıb.

“Səbail”in baş məşqçisi Şahin Diniyev Futbolxeber.az saytına açıqlamasında A.Ramazanovun fərdi şəkildə topla məşq etdiyini bildirib: “Hələlik Ağabala ümumi qrupa qoşulmayıb. Sadəcə məşqdə toplarla kontaktsız hazırlıq keçdi. Fərdi şəkildə məşqləri davam etdirir. Düşünürəm ki, maksimum “Qarabağ”la oyundan sonra, aprelin 7-dən Ağabala komanda ilə birgə ümumi məşqlərə qoşula biləcək”.   

Görəsən, mövsümün son turlarında Ağabala meydana çıxa bilər, yoxsa Şahin Diniyev risk etməyəcək: “Qarabağ”la oyundan sonra mövsümün sonuna 7 tur qalacaq. Yəqin 2 tur da komanda ilə birgə məşq etsə, son 3-5 turda Ağabala meydana çıxa bilər. Demirəm əsas heyətdə, lakin sonradan şans qazanması mümkündür. Maksimum son 5, minimum son 3 turda oynamağına imkan olacaq. Təbii ki, hər şey normasında gedərsə”.