Türkiyə mediasından Juninyo ilə bağlı yeni iddia

Türkiyə mediası “Beşiktaş"ın "Qarabağ"ın futbolçusu Olavio Juninyonu transfer etməsinə dair yeni məlumat yayıb.

 

Futbolxeber.az saytının məlumatına görə, Fotomac” qəzeti yeni iddia irəli sürüb.

 

Daha əvvəl klubun idman direktoru Samet Aybaba Ağdam təmsilçisinin Avroliqanın 1/8 finalında "Bayer"lə səfər matçına getmiş və Juninyonu daha yaxından izləmişdi. 27 yaşlı hücumçunun oyununu bəyənən direktor onu klub rəhbərliyinə tövsiyə etmişdi. Məlumata görə, bundan sonra klublar ilkin danışıqlar aparıblar və "Qarabağ" braziliyalı futbolçusuna görə qarşı tərəfdən 8 milyon avro istəyib.

 

“Fotomaç” nəşrinin yazdığına görə, Son məlumatlara əsasən, “Qarabağ" transfer qiymətində böyük məbləğdə endirim edə bilər. Həmçinin qeyd olunub ki, Samet Aybaba cari mövsüm başa çatmazdan əvvəl Azərbaycana səfər edərək “Qarabağ” klubu ilə danışaqlar aparacaq.

 

Qeyd edək ki, bu mövsüm Juninyo "Qarabağ"ın heyətində meydana çıxdığı 43 matçda 23 qol vurub və 7 qol ötürməsi edib. Onun “Qarabağ”la müqaviləsinin müddəti 2026-cı ilin iyununa qədərdir.