“Sumqayıt”da milliyə layiq futbolçular var”

“Sumqayıt”ın kapitanı Elvin Bədəlov bu klubdan heç bir futbolçunun Azərbaycan millisinə dəvət almamasına münasibət bildirib.

Futbolxeber.az saytına açıqlamasında təcrübəli müdafiəçi “Sumqayıt”da millinin formasını geyməyə layiq futbolçuların olduğunu vurğulayıb:

“Bu, məşqçilərin qərarıdır. Lakin dəvət olacağını gözləyirdik. Çünki  “Sumqayıt”da milliyə layiq futbolçular var. Bundan artıq nəsə deyə bilmərəm. Milli komandamıza da, uşaqlara da uğurlar arzulayıram”.

“FIFA series - Edition 2024” layihəsi çərçivəsində Azərbaycan millisinə rəhbərlik edən Arif Əsədov da məsələyə münasibət bildirib.

Dünən oyunöncəsi mətbuat konfransında Futbolxeber.az saytının əməkdaşının “Sumqayıt” cari mövsüm inamlı təsir bağışlasa da, bu komandadan heç kimin milliyə dəvət almaması nə ilə əlaqədardır?” sualını A.Əsədov belə cavablandırıb: “Bütün komandaları izləyirik. Hər futbolçu üçün millinin qapısı açıqdır. Bu toplanışa “Sumqayıt”dan kimisə düşünmədik. O demək deyil ki, onlar həmişəlik kənarda qalırlar. Elə bu toplanışın gedişdə də “Sumqayıt”ın futbolçularından yararlana bilərik”.

Qeyd edək ki, uzun fasilədən sonra ilk dəfə olaraq Azərbaycan millisinin heyətinə “Sumqayıt”dan heç bir futbolçu dəvət almayıb. Yığmanın məşqçilər korpusu yalnız Murad Xaçayev və Rövlan Muradovun adını ehtiyat oyunçular siyahısına daxil ediblər.