"Qarabağ"la oyunda azarkeşlərimizin ürəyi bir-iki dəfə dayandı”

“Baş verənləri necə adlandıracağımı bilmirəm. Oyunun gedişatı tamamilə bizə qarşı idi".

Futbolxeber.az saytının "Kicker"ə istinadən verdiyi məlumata görə, bu sözləri "Bayer"i kapitanı Robert Andrix UEFA Avropa Liqasının 1/8 finalının "Qarabağ"la cavab matçından sonra deyib.

Almaniyalı yarımmüdafiəçi son dəqiqə qolu ilə qalib gəlmələrinə baxmayaraq, "Qarabağ"dan daha yaxşı formada olduqlarını qeyd edib: "Şikin qələbə qolundan sonra düşündüm: "Biz bunu yenə etdik?" Əla komandamız var. “Qarabağ”dan qat-qat yaxşı formada idik. Nəticə gözəldir, amma tez-tez oyunun taleyini əlavə vaxtda həll etmək bizə lazım deyil. Məncə, azarkeşlərin də buna ehtiyacı yoxdur. Çünki "Qarabağ"la oyunda azarkeşlərin ürəyi bir-iki dəfə dayandı. Mən 3:0 hesablı qələbəni daha üstün tutardım. Çünki hər dəfə belə sehrli sonluq ola bilməz".

Xatırladaq ki, "Qarabağ"la "Bayer" arasında Bakıda keçirilən oyunda 2:2 hesabı qeydə alınıb. Leverkuzendə ötən gecə oynanılan görüşdə isə "Qarabağ" 2:0 hesabı ilə öndə olsa da, son dəqiqələrdə buraxdığı qollara görə uduzub və iki oyunun nəticəsinə əsasən (2:3, 2:2), mübarizəni dayandırıb.