Şahin Diniyev: “Ata üçün oğlunun “Qalatasaray”a qarşı oynaması fəxrdir”

“Oyunu izlədim, bizim üçün olduqca maraqlı idi. "Qalatasaray" Çempionlar Liqasında mübarizə aparıb. Uşaq vaxtından övdlarımın formalarını alıb geydikləri "Qalatasaray"ın oyununu izləmək xoş təəssürat yaratdı”.

Futbolxeber.az saytına açıqlamasında bu sözləri “Səbail”in baş məşqçisi Şahin Diniyev oğlu Coşqunun Türkiyə kubokunun 1/16 final mərhələsi çərçivəsində “Qalatasaray”a qarşı oyununu şərh edərkən deyib.

Mütəxəssis “Qalatasaray”ın 4:1 hesablı qələbəsini səviyyə fərqi ilə izah edib: “Baxmayaraq ki, "Ümraniyəspor" birinci liqada oynayır, rəqibə qarşı layiqli müqavimət göstərdi. Amma yekunda həm keyfiyyət, həm də səviyyə fərqi öz sözünü dedi. "Qalatasaray"ın heyətində yer alan, transfer dəyəri yüksək futbolçuların ustalığı hesabı öz xeyrinə dəyişməyə şərait yaratdı. “Ümraniyespor”da isə böyük komandaya qarşı mübarizə var idi”.

O, Coşqunun inamlı təsir bağışladığını vurğulayıb: “Coşqun Diniyevin oyununu izləmək həm azərbaycanlı kimi, həm də onun atası kimi böyük bir xoşbəxtlik idi. Coşqun Diniyev bir tərəfdən uşaqlıqdan "Qalatasaray" azarkeşi olub. Bu gün isə azarkeşi olduğu kluba qarşı oynaması və mənim də bu oyunu izləməyim xüsusilə maraqlı idi. Öz mövqeyində inamlı oyun göstərdi. O, topla çox yaxşı rəftar edir. Məşqçi ona orta xətti bağlamağı tapşırmışdı. Mənə elə gəlir ki, həmin mövqedə elə də böyük problem olmadı. Coşqun Diniyev öz növbəsində böyük oyunçulara qarşı oynamasına baxmayaraq, sakit, təmkinlə çıxış etdi. Daha çox o, topla oynamağa üstünlük verirdi. Məncə, üstünə düşən işi layiqincə görə bildi”.

Şahin Diniyev bildirib ki, millimizin yarımmüdafiəçisi Superliqada forma geyməyə qadirdir: “Bəli, Coşqun Diniyev Superliqada da oynaya bilər. Düzdür, demirəm ki, "Qalatasaray", "Beşiktaş" kimi klublarda. Əsas olan komanda işidir. Futbolçunun yaxşı çıxış etməsi üçün yanında oynayanlar da yaxşı oynamalıdır. Bununla da futbolçu özünü yaxşı hiss edə bilər. Coşqun "Qalatasaray"a qarşı oyunda əlacsız qalmadı”.

Maraqlıdır, bir ata üçün oğlunun “Qalatasaray”a qarşı oynaması necə hissdir?

“Oğlumun "Qalatasaray"a qarşı oynaması fəxrdir. Azərbaycanlı futbolçunun belə bir matçda iştirak etməsi qürurverici bir hissdir. Coşquna uğurlar arzulayıram. Düşünürəm ki, o, düzgün yoldadır, inkişafı göz qabağındadır”.

Azad NURİYEV