Qurban Qurbanovdan onun gedişinə yaşıl işıq: “Bu təklifin istisna hal kimi dəyərləndirilməsini istədi”

“Qarabağ”ın baş məşqçisi Qurban Qurbanov komandanın müdafiəçisi Rahil Məmmədovun Polşanın LKS klubuna transfer olunmasına razılıq verib.

Futbolxeber.az saytına açıqlamasında bu barədə “Qarabağ”ın mətbuat xidmətinin rəhbəri Anar Hacıyev məlumat verib.

O vurğulayıb ki, digər futbolçulardan fərqli olaraq Rahil Məmmədovun gedişinə baş məşqçi istisna hal kimi yanaşılmasını istəyib:

“Klubumuz hər zaman idman prinsiplərini üstün tutur və nəticələrlə azarkeşlərimizi sevindirmək əsas prioritetdir. Bildiyiniz kimi, hazırkı qış transfer dönəmində bir neçə futbolçumuza təkliflər olsa da, heç bir futbolçunun buraxılmaması qərarı verilmişdi. Amma baş məşqçimiz Qurban Qurbanov Rahilin milli komandamızın üzvü olmasını, legioner həyatı yaşamaq istəyini və karyera perspektivini nəzərə alaraq bu təklifin istisna hal kimi dəyərləndirilməsini istədi və rəhbərlik məsələyə etiraz etmədi”.