Şahin Diniyev: “Bu seçimimizdə yanılmamalıyıq”

“Yanvarın 5-dən Antalyada məşqlərimizi bərpa etmişik. Gündə 2 dəfə olaraq hazırlıqlar davam edir”.

Futbolxeber.az saytına müsahibəsində bu sözləri “Səbail”in baş məşqçisi Şahin Diniyev deyib.

Təcrübəli mütəxəssis hazırlıqlara yüksək səviyyədə yanaşadıqlarına görə futbolçularına təşəkkür edib: “Əsas istiqamətimiz funksional hazırlıqdır. Futbolçularıma təşəkkür edirəm, hər biri bunu anlayıb məşqlərə yüksək səviyyədə konsentrasiya olurlar. Gördüyümüz işin effektli olması məşqdən asılıdır”.

O, zədəli futbolçulardan yalnız birinin məşqlərə başladığını qeyd edib: “İtkilərimiz çoxdur. Bir neçə futbolçu təlim-məşq toplanışına qoşula bilməyib. Cabir Əmirli məşqlərə qoşula bildi. Ancaq əməliyyatdan yeni çıxdığı hiss olunur. Bərpa dövrünü keçib. Hələ ki, tam hazır deyil. Düşünürəm ki, bu məşqlər onun üçün çox xeyrli olacaq. Ağabala Ramazanov, David Qomis və Süleyman Əhmədov isə əməliyyat olunub. Bu 3 futbolçu da məşqlərə başlaya bilmir. Əfsuslar olsun ki, bunlar bizimçün böyük itkilərdir”.

Diniyev transfer çalışmaları barədə də danışıb: “Hazırda çox çətin dövrdür. Qış transfer bazarında yaxşı futbolçu tapmaq olduqca çətindir. Seleksiya şöbəmiz bu barədə fəal çalışır, öz səylərini əsirgəmirlər. Mənim də düşüncəm odur ki, futbolçu komandaya kömək olmalıdır. İlk 2 dövrədən sonra komandanın nələrə sahib olduğunu bilirəm. Ona görə də komandamıza gələn futbolçu mütləq dəqiq, yerində, nöqtəli transfer olmalıdır. Bu yöndə iş gedir. Hazırda komandaya yeni qoşulan yoxdur. 2-3 gün ərzində bu işlər yekunlaşacaq, çünki sonra gec ola bilər. Transfer xətrinə də transfer etmək istəmirəm. Bu işdə çox həssasıq. Futbolçunu bəyənirəmsə, heyətə gətiririk. Baxış olmayacaq. Xoşumuza gələn futbolçu olarsa, dərhal müqavilə bağlayıb məşqlərə başlayacaq. Bu seçimimizdə yanılmamalıyıq”.

Sonda “Səbail”in çalışdırıcısı “Amil Yunanovdan başqa, hansısa futbolçunun gedişi, yaxud icarəyə verilməsi gözlənilirmi?” sualını cavablandırıb: “Amil Yunanovdan sonra komandadan gedən olmayacaq. Heyətdə futbolçu qıtlığı var. Oyunçularımızın sayı az olduğu üçün kiminsə getməsi müzakirə mövzusu deyil. Amil oyun praktikası az olduğu üçün komandanı tərk etdi”.

Azad NURİYEV