Elmar Baxşıyev: “O, rəsmi şəkildə komandadan getməyib”

“Ayın 4-dən Qəbələdə məşqlərimizi davam etdiririk. Komandada hər şey qaydasındadır. Yanvarın 10-da və 15-də “Kəpəz” və “Araz-Naxçıvan”la yoxlama oyunlarımız olacaq”.

Futbolxeber.az saytına açıqlamasında bu sözləri “Qəbələ”nin baş məşqçisi Elmar Baxşıyev deyib.

Mütəxəssis transfer çalışmalarından da söz açıb: “Bu ana qədər heyətdə ciddi bir dəyişiklik yoxdur. Təbii ki, yeni transferlər üzərində iş gedir. Bəzi oyunçuları nəzərdən keçiririk. Ola bilər ki, bəzi futbolçular da komandanı tərk etsin”.

Mətbuatda artıq Omar Haninin “Qəbələ”dən getdiyi barədə xəbərlər yayılıb. Baxşıyev iordaniyalı futbolçu ilə bağlı bunları söyləyib: “Omar Hani rəsmi şəkildə komandadan getməyib”.

Əyalət təmsilçisinin liberiyalı yarımmüdafiəçi, “İmişli”dən ayrılan Tonia Tisdellə maraqlandığı barədə də xəbər yayılıb. “Qəbələ”nin çalışdırıcısı bu məlumatı da təkzib edib: “Tisdell maraq dairəmizdə deyil”.

Elmar Baxşıyev hazırda bir neçə futbolçu ilə maraqlandıqlarını vurğulayıb: “İzlədiyimiz oyunçular var. Onlarla danışıqlar uğurlu alınsa, keçidləri mümkündür. Ad açıqlaya bilmərəm. Düzdür, danışıqlar gedir. Lakin məsələ həll olunmadığından konkret kiminsə üzərində dayanmaq olmur”.

İbrahim CƏFƏROV