37 yaşını qeyd edən Rüstəm Allahverdiyev: “İnsanın canı sağlam olduqdan sonra hər şey qazana bilər”

“Hələ ki gələcək fəaliyyətimlə bağlı heç bir yenilik yoxdur”.

Futbolxeber.az saytına müsahibəsində bu sözləri bir müddət əvvəl “Neftçi”dən ayrılan Media, Marketinq və İctimaiyyətlə Əlaqələr Departamentinin sabiq rəisi Rüstəm Allahverdiyev deyib.

O, bir müddət istirahət etdiyini bildirib: “Son 3 ildə istirahət etmədən, məzuniyyətə çıxmadan işləmişəm. Öz-özümə dedim ki, bir az istirahət etmək lazımdır. Bir müddətdən sonra yeniliklər olacaq. Təbii ki, belə qala bilməz. Mənim də ailəm, uşaqlarım var, onları düşünməliyəm (gülür)”.

“Neftçi”dən öncə Sumqayıt Sənaye Parkının mətbuat xidmətində çalışan Rüstəm Allahverdiyev yenidən futbolda deyil, başqa sferada çalışa biləcəyini istisna etməyib: “Başqa yerdən təklif olub. Amma danışıqları bayramdan sonraya saxlamışdıq. Ölkədə iş 2 gündür başlayıb. Yəqin ki, yaxın günlərdə bu məsələni müzakirə edəcəm. İşlə bağlı konkret təkliflər yox, sadəcə müzakirələr olub. Konkret söhbət olmayıb. Hələ ki, futbol sahəsində qalmaq istəyirəm. Çünki son 5 ildə bu ixtisas üzrə bir çox dünyada tanınan kursları başa vurmuşam. Hazırda Baxçaşəhər Universitetində bu sahədə təhsil alıram. Burada ixtisaslaşmaq istəyirəm. "Neftçi"də olduğum dönəmdə sübut etmişəm ki, Azərbaycanda idman (futbol) marketinqi var və bunu inkişaf etdirmək olar. "Neftçi"də geriyə dönüb baxsaq, nə qədər böyük işlərin baş tutduğunu görə bilərsiniz. Bu barədə çox danışmaq istəmirəm. Bircə sözlə ifadə etsəm, son 5 il ərzində "Neftçi"nin marketinq departamentinin və klub rəhbərliyinin dəstəyi ilə kluba 15 milyon manata yaxın vəsait qazandırılıb. Bunun üçün qarşımıza qoyulan plan, büdcə il tamam olmamış artıq 3-4 ayın içində həll olunmuşdu. Plan da artıqlaması ilə icra olunmuşdu. Məqsədlər fərqli olanda, baxışlar da fərqli olur. "Neftçi"də planlaşdırdığım və edə bilmədiyim, yarımçıq qalan layihələri istərdim ki, başqa bir klubda tətbiq edim və tamamlayım. Başqa sahədə isə uyğun bir təklif olarsa, niyə də olmasın!?”

Allahverdiyev “Maraqlıdır, kənardan Azərbaycan futbolu necə görünür?” sualını belə cavablandırıb: “Kənardan futbolu belə ifadə edə bilərəm. Bir qədər asan görünür. İşdən çıxdıqdan sonra baxdığım ilk oyun "Neftçi"nin "Ərzurumspor"la baş tutan yoldaşlıq matçı oldu. Futbol asan deyil. İçəridə 90 dəqiqəlik bir matçın baş tutması üçün hansı proseslərin getdiyini bu sahədə işləmiş biri olaraq olduqca yaxşı bilirəm. Kənardan bunun necə olduğunu hələ hiss edə bilməmişəm. Buna cavab vermək bir qədər çətindir. Müəyyən dövr olub ki, 2 ilə yaxın futboldan uzaq qalmışam. Həmin dövrdə belə müəyyən qədər futbolun içərisində idim”.

Həmsöhbətimiz bu gün 37 yaşını qeyd edir. Görəsən, 37-ci ad günündə Rüstəm Allahverdiyev özünə nə arzulayır?

“Özümə yalnız cansağlığı arzulayıram. Yaxınlarım, ətrafım bilir ki, 2023-cü il mənimçün gedişli-gəlişli bir il oldu. Sağlıqla bağlı müəyyən problemlərimiz oldu. İnsanın canı sağlam olduqdan sonra pul, iş - hər şey qazana bilər. Bu ildə qarşıma qoyduğum plan, məqsədlərimə çatmaq, həyata keçirməyi özümə və hər kəsə arzu edirəm”.

Azad NURİYEV