Miço Kuzmanoviç: “Avrokuboklar? Niyə də yox?! Biz buna inanırıq”

“10 gündən sonra Bakıda məşqlərə başlamışıq. İstirahəti öz evimdə etdim və yenidən komandaya qoşuldum. Hazırda isə mövsümün ikinci hissəsinə hazırlaşırıq. Qış fasiləsindən sonra yaxşısını etməyə çalışacağıq”.

Futbolxeber.az saytına müsahibəsində bu sözləri “Araz-Naxçıvan”ın yarımmüdafiəçisi Miço Kuzmanoviç deyib.

Bosniyalı futbolçu fasilədən sonra özünü daha yaxşı hiss etdiyini bildirib: “Hər şey əladır. Özümü burada yaxşı hiss edirəm. Əhval-ruhiyyə yüksək səviyyədədir. Adaptasiya üçün azacıq vaxta ehtiyacım var. Ümumi götürdükdə, heç bir problem yoxdur”.

28 yaşlı yarımmüdafiəçisi mövsümün ikinci yarısı üçün hədəflərindən də söz açıb: “İlk olaraq daha yaxşı performans nümayiş etdirmək istəyirik. Ötən ilki çıxışımıza qaldığımız yerdən davam etmək niyyətindəyik. Yeni formalaşan komanda olaraq hər oyun daha yaxşısını ortaya qoyuruq. Komanda da hər kəs əlindən gələni edir ki, yekunda nəticələrimizi daha da yaxşılaşdıraq”.

Kuzmanoviç qeyd edib ki, ilk üçlükdə yer almaq üçün əllərindən gələni edəcəklər: “Turnir cədvəlində komandaların xalları bir-birinə çox yaxındır. Rəqabətli çempionat gedir. Bütün komandalar bir-birinə qarşı başa-baş mübarizə aparır. Belə hal biz oyunçular üçün çempionatı daha da maraqlı edir. Hər matçı qalib başa vurmağa çalışırıq. Mövsümü ilk üçlükdə başa vurmaq üçün əlimizdən gələni edəcəyik”.

O, avrokuboklara vəsiqə qazanacaqlarına inanır: “Niyə də yox?! (gülür) Biz buna inanırıq. Komanda olaraq çalışırıq”.

Azad NURİYEV