Adil Şükürov: “Bundan sonra daha çox müdafiə xətti ilə maraqlanırıq”

“Kəpəz”in baş məşqçisi Adil Şükürovun Futbolxeber.az saytına müsahibəsi

- Bu gün (söhbət dünən olub-red.) komandanız məşqləri bərpa etdi. İlkin təəssüratlar necədir? Futbolçular durumu hansı səviyyədədir?

- Bəli, komanda məşqlərə start verdi. İlk gördüyümüz odur ki, futbolçular yaxşı tətil keçiriblər və hamının əhval-ruhiyyəsi də yaxşıdır.

- Hazırlıq prosesində Amil Yunanovdan başqa, yeni futbolçu iştirak edir?

- Amillə yanaşı, Ədilxan  Qarəhmədov məşqlərə qoşulub. Böyük ehtimalla, gəncəli  futbolçular var ki, onları da  yoxlanış məqsədi ilə komandanın  məşqlərinə cəlb etməyi düşünürük.

- Bəs komandadan gedən olub?

- Vladislav Vasilyuçek və Elnur Cəfərov ilə danışmışıq ki, gələcəkdə onlara az şans veriləcək. Bunun üçün də özlərinə yeni komanda tapsınlar. Daha çox şans veriləcək komandaya keçmək istəsələr, biz tərəfdən problem olmayacaq

- Ən çox hansı mövqeləri gücləndirmək istəyirsiz?

- Bundan sonra daha çox müdafiə xətti ilə maraqlanırıq. Ən vacib isə  bu mövqeyi də yerli futbolçu ilə gücləndirmək istəyirik.

- Birinci Liqadan iki futbolçu, “Karvan”dan Peter Kinqsi və “İmişli”dən ayrılan Tonia Tisdelin maraq dairənizdə olduğu barədə yayılan xəbərlər nə dərəcədə doğrudur?

- Xeyr, bu futbolçularla maraqlanmamışıq. Yayılan xəbər həqiqəti əks etdirmir.

- “Kəpəz”in qış təlim-məşq toplanışı üçün ölkə xaricinə yollanmaması maddi vəziyyətlə əlaqədardır, yoxsa vaxt azlığından ölkədən çıxmamaq qərarına gəldiz?

- Gəncədə hazırlıq keçməyi üstün tutduq. Çünki bunun üçün klubda  hər bir şərait və imkanlar  mövcuddur. Həm də əvvəlki illərdən fərqli olaraq bu dəfə çempionatda qış fasiləsi qısa çəkəcək. Odur ki, ölkə xaricinə  çıxmağı lazım bilmədik.

Azad NURİYEV