Samir Abasov: “Desəm ki, hazırda maraq dairəmizdə olan konkret futbolçu var, yalan olar”

“Sumqayıt”ın baş məşqçisi Samir Abasovun Futboıxeber.az saytına müsahibəsi

- Yeni iliniz mübarək. 2024-cü ili necə qarşıladız?

- Həmişəki kimi, evdə ailəmizlə. Bayram günlərini elə də təmtəraqlı qeyd etməyi xoşlamıram.

- Bu gün komandada istirahət bitdi və məşqlərə başladız. İlkin təəssürat necədir: artıq çəki ilə qayıdan yoxdur? 

- Yox, hər şey qaydasındadır. Artıq çəki ilə qayıdan da yoxdur. İlk məşq yaxşı keçdi. Əvəzedici heyətdən də bəzi oyunçuları məşqlərə cəlb etmişik. Hansılar ki, bizimlə birgə Antalyaya təlim-məşq toplanışına da gedəcəklər. Əvəzedici heyətdəki bacarıqlı uşaqları həmişə yoxlayırıq, baxırıq. Çalışırıq ki, onlara şans verək. 3 gün burda, Sumqayıtda məşq edəcəyik. Sonra Antalyaya yollanacağıq. Səfərə 20 futbolçu ilə gedəcəyik. Onlardan 5 nəfəri əvəzedici heyətdən olacaq. Dediyim kimi, o uşaqlar daim diqqətimizdədirlər. U-19-da oynayanda var, hamısı öz yetirmələrimizdir.

- Bugünkü məşqdə ancaq yerlilər iştirak etdi. Legionerlər komandaya nə vaxt qoşulacaq?

- Onlar komandaya yanvarında 6-da, birbaşa Antalyada qoşulacaqlar. Artıq orada tam heyətlə çalışmalara başlayacağıq.

- “Səbail”lə oyundan sonra demişdiz ki, Antalya səfərimiz baş tutmaya bilər. Amma komanda 6-da səfərə yollanacaq. Bu qərarda hansı amil həlledici oldu?

- Həmin vaxt demişdim ki, özümüz qərarımızı dəyişə bilərik. Lakin fikrimizdə qaldıq. Həm hava amili, həm Antalyadakı şəraitin yerini heç nə verə bilmir. Oyunları da nəzərə almaq lazımdır. Rəhbərliklə danışdıq. Fikirləşdik ki, ən yaxşısı elə Antalyaya yollanmaqdır. Düzdür, zədəli oyunçularmız da çoxdur. Velinovski uzun müddətə sıradan çıxıb, son matçda Ninqa zədələnib, Vüqar əməliyyat olunub. Bu vəziyyətdə təlim-məşq toplanışı üçün ölkə xaricinə yollanmağın mənası varmı? Yekunda qərara gəldik ki, əlimizdə olan oyunçularla toplanışına yollanaq.

- Antalya toplanışında ilk oyununuz təxirə salındı, sonradan digər iki rəqibin adı açıqlandı. Birinci matç üçün rəqib axtarışı davam edir, yoxsa elə 2 oyunla kifayətlənəcəksiz?

- Yox, hazırlığı elə iki oyunla yekunlaşdıracağıq. Düzdür, ayın 8-nə də oyun danışmışdıq. Lakin rəqib Antalyaya gələsi olmadığı üçün həmin matç təxirə salındı. Digər görüşlərlə bağlı problem yoxdur. Yanvar 12-də Rumıniyanın "Hermanştadt", 16-da isə Özbəkistanın "Soqdiana" klubu ilə qarşılaşacağıq.

- Transfer çalışmaları ilə bağlı nə kimi yeniliklər var?

- Hələ ki bir yenilik yoxdur. Bir, ya iki oyunçu götürmək istəyirik. Bizə uyğun olsa, istədiyimiz kimi futbolçu tapa bilsək, keçidi reallaşdıracağıq. Ola bilər hansısa futbolçu Türkiyə gəlsin. Amma desəm ki, hazırda maraq dairəmizdə olan konkret futbolçu var, yalan olar. İllərdi hamımız bilirik ki, qışda futbolçu tapmaq çətindir. Amma yenə də işləyirik, axtarışdayıq.

- Ən çox hansı mövqeləri gücləndirmək istəyirsiz?

- İlk növbədə vingerə ehtiyacımız var. Bəzi futbolçuların, xüsusən də Velinovski və Ninqanın zədələnməsi planlarımızı pozdu. Odur ki, ilk növbədə vinger transfer etməliyik.  

- Bəs komandadan gedən olacaq?

- Xeyr. Onsuz da hazırkı məqamda heyətimiz kasaddır. Odur ki, kimisə göndəmək fikrimiz yoxdur.

Fərəc ASLANOV