Yuri Syomin: “Bojoviçin “Neftçi”də uğur qazanmaq şansı yüksəkdir”

Tanınmış rusiyalı mütəxəssis, “Qəbələ”nin sabiq baş məşqçisi Yuri Syominin Futbolxeber.az saytına müsahibəsi

- Uzun illər Rusiyada çalışan Miodraq Bojoviç bu günlərdə "Neftçi"nin baş məşqçisi təyin edildi. Monteneqrolu mütəxəssisi necə xarakterizə edərdiz? Hansı müsbət keyfiyyətlərini qeyd etmək mümkündür?

- Bojoviç təcrübəli məşqçidir. Hər zaman komandada yaxşı atmosfer yaradır. O, qalib gəlməyi bacarır. Futbolçulara nə istədiyini izah edir. Onun rəhbərliyi altında oyunçular da inkişaf edirlər. Nəticələri də yaxşıdır. “Rostov”la kuboku qazanmışdı, “Amkar”la final oynayıb. Eləcə də “Lokomotiv”də, “Dinamo”da işləri pis alınmayıb. Təbii ki, bəzən uğursuzluqlar da olur. Bu da qaçılmazdır. Amma ümumi götürdükdə, yaxşı məşqçidir.

- Onun “Neftçi”dəki karyerasının uğurlu alınması nə dərəcədə realdır?

- Məncə, uğurlu olmaq şansı yüksəkdir. Əsas məsələ futbolçularla düzgün əlaqə qurmaqdır. Oyunçular da daha intizamlı olmalıdırlar. Çünki bu məqama Bojoviç xüsusi diqqət ayırır. Bir sözlə, uğur qazanması mümkündür.

- Bəziləri Bojoviçin tez-tez klub dəyişməsini mənfi məqam kimi qiymətləndirirlər. Bu fikrə münasibətiniz necədir?

- Bu, Bojoviçin, yaxud hansısa məşqçinin günahı deyil. Müasir futbolda belədir. Əksər klublar məşqçi ilə 1-2 illik müqavilə imzalayırlar. Ona görə də məşqçi dəyişiklikləri tez-tez olur. Bu, məşqçidən çox, idman direktorlarından, klub rəhbərlərindən asılı olan məsələdir. Məncə, Bojoviç klub rəhbərliyi ilə yaxşı əlaqə qura bilsə, “Neftçi”də uzun müddət işləyəcək.

- Adətən Azərbaycanda avropalı yox, keçmiş SSRİ-dən olan məşqçilər uğur qazanırlar. Sizcə, bunun səbəbi nədir?

- Mən məşqçiləri avropalı, yaxud keçmiş SSRİ-dən olanlar deyə bölmək istəməzdim. Ola bilər dediyiniz məqam var və bu, mantelitetdən asılıdır. Amma ümumi götürdükdə, dediyim kimi, tez-tez məşqçi dəyişməsi sanki zamanın tələbinə çevrilib. Əvvəl məşqçiyə daha çox şans verirdilər. Komanda məğlub olanda da hamı bunu birlikdə qəbul edirdi. İndi 1-2 oyun uduzan kimi günahkar məşqçi göstərilir və dərhal da onu göndərirlər. Hamı erkən uğur istəyir. Heç kim gözləmək istəmir.

- Sabiq klubunuz “Qəbələ”nin hazırkı durumunu necə dəyərləndirirsiz?

- Açığı, son aylar nəticələrdən xəbərsizəm. Bilirəm ki, ötən mövsüm “Qəbələ” kuboku qazandı. İndi çempionatda neçənci yerdədirlər?

- Sonuncu.

- Deməli, “Qəbələ” Premyer Liqanı tərk etmək təhlükəsiz ilə üz-üzədir?

- Lakin qarşıda hələ 2 dövrə var.

- Müasir futbolda çox şey puldan asılıdır. Komandaya diqqət azaldısa, nəticələr də pisləşir. Mənim dövrümdə komandaya böyük diqqət var idi. Mən “Qəbələ”də çalışdığım müddətdə heç bir problemlə üzləşməmişdim. Əla meydançalar var idi, futboçular maaşlarını həmişə vaxtında alırdılar. Kimi istəyirdim, real şəkildə təbii ki, dərhal həmin oyunçu transfer olunurdu. Təəssüf ki, indi “Qəbələ”nin maddi vəziyyəti əvvəlki kimi deyil.

- Avroliqada qrup ikincisi olan “Qarabağ” pley-offda “Braqa” ilə üz-üzə gələcək. Necə düşünürsüz, Portuqaliya təmsilçisini mübarizədən kənarlaşdırmaq nə dərəcədə realdır?

- Şanslar bərabərdir. “Qarabağ” əla komandadır. Bayaq məşqçiyə şans vermək barədə söhbətimiz. daha bir nümunə elə Qurban Qurbanovdur. O, uzun illərdi “Qarabağ”da çalışır və əla nəticələr qazanır. Klub rəhbərliyi də ona dəstək olur. Qurbanovun sözü böyük əhəmiyyət kəsb edir. Futbolçular da hiss edir ki, komandada əsas söz sahibi məşqçidir. Buna görə təkcə daxildə deyil, xaricdə də komanda uğur qazanır. Rəhbərlik-klub-məşqçi amili böyük rol oynayır. Məşqçiyə hörmət var. Bu da uğur gətirir. Eyni hal məndə “Lokomotiv”də də olub. İndi yox, daha əvvəli nəzərdə tuturam.

- Hazırda AFFA milli üçün baş məşqçi axtarışındadır. Təklif olsa, razılaşarsız?

- Əlbəttə, niyə də yox?! Böyük məmuniyyətlə Azərbaycan millisində işləməyə hazıram. Hazırkı komandanın potensialına bələdəm. Məncə, Azərbaycan millisində heç də zəif futbolçular cəmləşməyib. Düzdür, yığmada daha əvvəl də xarici məşqçilər işləyib və bir qədər uğursuzluqla üzləşiblər. Bunun bir neçə səbəbi var. Əsas faktorlardan biri oyunçuları yaxşı tanımamaqdır. Eləcə də mentaliteti bilmirlər. Hesab edirəm ki, Azərbaycan millisi ilə daha yaxşı nəticələr qazanmaqdır. Amma təbii ki, dünya kubokunu qazanmağa söz verə bilmərəm (gülür).

Fərəc ASLANOV