Vojislav Stankoviç: “Mutunun uğursuzluğuna səbəb yeni transferlər oldu”

“Neftçi”nin sabiq müdafiəçisi Vojislav Stankoviçin Futbolxeber.az saytına müsahibəsi

- 4 ilə yaxın çıxış etdiyiniz “Neftçi”dəki günlərinizi necə xatırlayırsız? Sabiq klubunuz üçün darıxırsız?

- “Neftçi”də yaxşı günlərim olub. Hər zaman onları xoş xatirə kimi xatırlayacam. Lakin “Neftçi” üçün darıxmıram. Çünki mən peşəkar futbolçuyam. Klubla yollarımız ayrıldı və indi karyeramı vətənimdə davam etdirirəm. Mənim əvəzimə də kluba yeni oyunçular gətirildi.

- Ümumiyyətlə, Serbiyaya yollandıqdan sonra Azərbaycan futbolu ilə maraqlanırsız?

- Bəli, imkan olduqca oyunlara baxıram. Ən azı epizodlara. Nəticələrdən xəbərdaram.

- Çoxları hesab edir ki, bu mövsüm Azərbaycan Premyer Liqası daha maraqlı keçir. Razısız bu fikirlə?

- Razıyam. Məncə də, çempionat daha da maraqlı olub. Bu mövsüm gərgin oyunların sayı artıb.

- Kənardan izlədiyiniz “Neftçi” əvvəlki mövsümlərə baxanda nə dərəcədə dəyişib?

- Təbii ki, “Neftçi” çox dəyişib. Komandaya xeyli sayda yeni futbolçu cəlb edilib. Eləcə də klubu tərk edənlər çox oldu. Həmçinin klub rəhbərliyində də dəyişiklik baş verib.

- Adrian Mutunun “Neftçi” karyerası cəmi bir neçə ay çəkdi. Sizcə, rumın mütəxəssis burada niyə uğur qazana bilmədi?

- Mutu yeni kluba gəldi. Hansı ki həmin klubda xeyli dəyişikliklər baş vermişdi. Heyət böyük ölçüdə yeniləndi. Düşünürəm ki, Mutunun uğursuzluğuna səbəb yeni transferlər oldu. Komandaya cəlb edilən yeni futbolçular öz köməklərini göstərə bilmədilər. Belədə nə “Neftçi” parlaq çıxış edə bildi, nə də Mutunun fəaliyyəti uğurlu alındı.

- Artıq Mutunun əvəzləyicisinin adı məlumdur. Eyni regiondan olduğunuz üçün yəqin ki, siz Miodraq Bojoviçi bizdən daha yaxşı tanıyırsız. Onun barəsində fikirləriniz necədir?

- Şəxsi tanışlığımız olmasa da, məşqçi kimi Miodraq Bojoviçi tanıyıram. Bilirəm ki, o, getdiyi hər yerdə uğur qazanıb. İstər Serbiyada, istərsə də Rusiyada. Çempionluq, kubok qazanıb. Miodraq Bojoviçin çox böyük məşqçi təcrübəsi var

- Necə düşünürsüz, Bojoviç “Neftçi”yə uğur qazandıra biləcək?

- Bunu zaman göstərəcək. Amma dediyim kimi, Bojoviç təcrübəli mütəxəssisdir. Lakin “Neftçi”nin oyununu yaxşılaşdırıb-yaxşılaşdırmayacağını, komandanın inkişaf edib-etməyəcəyini indidən dəqiq söyləmək çətindir.

İbrahim CƏFƏROV